Udaleko Gizarte Ongintzarako Patronatuak eskaintzen dituen hiru zerbitzuen laburpena egin du, 2010 urtekoa. Bertan, Eguneko Zentroak, Zaharren Egoitzak eta Etxez Etxeko zerbitzuak izan duten erabiltzaile kopurua zehaztu dute, eta bakoitzean ematen den zerbitzua ere azaldu dute. Guztira, 350 pertsona inguruk erabili zuten 2010ean hiru zerbitzuetako bat. Harrera haundiena Etxez Etxeko zerbitzuak izan zuen joan den urtean, 193 erabiltzailerekin; bigarren zerbitzu erabiliena Maria Magdalena Zaharren Egoitzak eskaintzen duena izan zen, 111 erabiltzailerekin; eta azkenik, 44 pertsona izan ziren Eguneko Zentrora joan zirenak.
Eguneko Zentroa:
Ohiko bizilekuan bizi,
eta egunean zehar
laguntza jaso
Eguneko Zentroa aukeratzen duten pertsona adinduak ohiko bizilekuan bizi dira, eta egunez joaten dira zentrora; bertan, behar duten laguntza jasotzen dute. Eguneko zentroan, adinduak, hainbat zerbitzu ditu eskuragarri egunero, besteak beste, ondorengoak: garraioa, norberaren higienea, mantenua, ile-apaindegia eta podologia, arreta pertsonala, ludikoa eta soziala.
2010eko erabiltzaileen datuei erreparatuz gero, 60 pertsona dira zerbitzua momentu jakin batean erabili zutenak. Erabiltzaile berriak edo altak 30 izan ziren, eta bajak 17. Hala, guztira, urtean zehar 44 pertsona izan ziren zerbitzua jarraian erabili zutenak. Horietatik 38k menpekotasun haundia zuten, eta 6k menpekotasun ertaina.
Etxez Etxeko zerbitzua:
Laguntza etxean jaso, arazoak dituztenean edo familiarrak iritsi ezin direnean
Etxez Etxeko zerbitzua publikoa da, hau da, debaldekoa. Normalean, bere kasa baliatzeko arazoa dutenek jasotzen dute, edo familiarekin bizi, baina hauek laguntzera iritsi ezin direnean eskatzen dute. Pertsona hauek arazo fisiko, psikiko edo sozialak izaten dituzte, baina arazoa bere onera ekartzeko helburua izaten dute. Bakoitzari, dagokion prebentzioa, asistentzia edo errehabilitazioa ematen diote.
Joan den urtean 193 pertsonek erabili zuten zerbitzua, hiruetatik gehien erabili zena izan zen. Horietatik 179 pertsona adinduak ziren, 8 diskapazitatuak, 2 familiakoak, eta 4 babestutako etxebizitzetan bizi zirenak. Zerbitzua jaso zuten pertsona adinduetatik 84k, menpekotasun haundia zuten; eta 56k ertaina.
Etxez Etxeko zerbitzua, gehienez, bi ordukoa izaten da, eta joan den urtean eman ziren zerbitzu kopuruak ondorengoak izan ziren: garbitasun pertsonalaren zerbitzua 40 pertsonek jaso zuten; etxeko lanena 57k; garbitasun pertsonala eta etxeko lanena 65 petsonek; erosketa eta otordu prestaketarena 21k; eta bestelako zerbitzua, 10 pertsonek.
Zaharren Egoitza:
bizileku segurua,
beharrei egokitua
Azkenik, Zaharren Egoitza da Ongintzak eskaintzen duen hirugarren zerbitzua. Egoitzak lau helburu ditu: bat, bizileku seguru eta iritsi-erraza izatea, beharrei egokitutakoa; bi, banakako intimitatea eta pribatasuna errespetatuta, elkarbizitza sortzea; hiru, bizi kalitatea eta auto-estimua hobetzea eta gizarteratzea; eta lau, behar duten laguntzaren arabera, behar duten arreta eskaintzea.
Zaharren Egoitzan 111 pertsona izan ziren 2010ean, horietatik 76 emakumezkoak eta 35 gizonezkoak. Horietatik, menpekotasun haundikoak 93 izan ziren, menpekotasun erdikoak 16 eta autonomia dutenak 2. Adina kontuan hartuta berriz, gehienak, %53,64a, 80-89 urte bitartekoak ziren.