MAILU Arruti, Ione Gorrostazu eta Olatz Etxeberria bakarrizketan ariko dira astelehenean, San Antonio Egunean, Ereñotzun. Aurtengo nobedadeetako bat da, afari herrikoiaren bueltan antolatu dutena, afaria bera girotzeko asmoz. Geroz eta arrakasta haundiagoa duen generoa da bakarrizketena, eta nahiz eta hasieran hala ez pentsatu, uste baino lan gehiago izaten ari dira astelehenean Ereñotzun izango diren hiruak. Kronikak Mailu Arrutirekin hitz egin du, eta azaldu duenez, gustura daude han-hemenka egiten ari diren lanarekin.
Hiru bakarrizketa,
bakoitzak berea
Ohi bezala, Ereñotzun ere, bakoitzak bere bakarrizketa egiten du, ordu laurden ingurukoa.
Mailu Arrutik garai bateko etxekoandreei buruzko bakarrizketa egingo du, etxekoandre profesionalen aldarrikapena eginez: «garai bateko markak, erosketak, garbiketak egiteko modua ekarriko ditut gogora». Ione Gorrostazuk berriz, txikia izateak dituen bentajei buruz egingo du bakarrizketa. Eta azkenik, Olatz Etxeberriak zentro komertzialetan erosketak egiteko moduari buruz.
«Bakarrizketak helduentzako ipuinak dira»
Mailu Arrutik azaldu duenez, bere iritziz, bakarrizketak helduentzako ipuinak dira. Eta engantxatzeko, publikoa identifikatua sentitzea ezinbestekoa da: «bizitzan, egunerokotasunean gertatzen diren egoera xelebreak kontatzen ditugu, eta bakarrizketak arrakasta izaten du publikoa egoera horietan erreflejatua sentitzen bada. Egoerak, normalean, ridikuluak izaten dira. Eta publikoak egoera hori noizbait bizitu badu, barre egiten du».
Erantzun ona espero dute, Ereñotzun
Adin tarte guztietako jendea espero da Ereñotzuko afarian, eta M. Arrutik dio, hori garrantzitsua dela bakarrizketak egiterako orduan: «Ereñotzun erantzun ona espero dugu. Publikoa orduan eta adin tarte zabalagokoa izan, hobeto. Azkenean, egoera ezberdinak kontatzen ditugu, adin ezberdinetara egokituta prestatu ditugun egoerak».