Gipuzkoako Herriarteko Txapelketan, finalerdietako joaneko kanporaketa jokatuko du Hernanik, gaur. Txapelketa irabazteko faboritoa den taldea izango du aurrez aurre: Oiartzun. Norgehiagokak 19:45etan hasiko dira, Oiartzunen.
Kadeteetan, zaila;
jubeniletan, parekatua;
eta seniorretan, faborito
Kadete mailan, Egoitz eta Josu Altuna anaiek Zapirain eta Ugalde IIaren aurka jokatuko dute, eta partidu zaila espero dute. Ugalde II esaterako, maila horretako pelotaririk onentsuena da. Dena dela, hernaniarrak fin ari dira eta jokatutako 4 partiduetatik 3 irabazi dituzte.
Jubeniletan, Eneko Lujanbio eta Aritz Murgiondo, Sarasti eta Imazen aurka neurtuko dira. Oso norgehiagoka parekatua espero da. Hala ere, Hernaniarrek partidu guztiak irabazi dituzte eta konfiantza haundia dute beraiengan.
Seniorretan, faborito izango dira Ioritz Arrieta eta Aitor Gorrotxategi hernaniarrak. Besteak beste, Arrieta aurrelaria bueltan izango da lesio luze baten ondoren eta daukan guztia ematera aterako da frontoira. Gorrotxategi maila ona ematen ari da.