«AHT egiazko informaziorik gabe, eta jendearen partehartzea galerazita garatzen ari den proiektua da. Oposizioa kriminalizatua eta gogorki erreprimitua izan da. Hau da, AHT indarrez inposatutako egitasmoa da», hala deskribatu zuten atzo prentsaurrean AHTaren proiektua, Hernaniko AHTaren aurkako kideek. Prentsaurrean, K-AHT-EAK Txikitu ekimena aurkeztu zuten, larunbaterako antolatutako ekitaldiak azaldu zituzten, eta argitaratu berri duten txostenaren berri ere eman zuten.
«Kaltetutako batzuk bildu ondoren sortutako taldea da K-AHT-EAK txikitu»
K-AHT-EAK Txikitu ekimena 2010 urtearen bukaeran sortu zela adierazi zuten atzo, «errepresaliatutako batzuk bildu ondoren erabaki genuen sortzea». Segidan, taldearen hiru helburu nagusiak azaldu zituzten: batetik, AHTak kaltetutako guztiak elkartzea bilatzen duela azaldu zuten; indarra batu eta erabakiak batera hartzeko asmoarekin: «euren arteko koordinazio minimo bat sortzea da helburua, eta hainbat tresna erabiliz, isunei aurre egitea»; bestetik, erreprimituak edo kaltetuak izan diren pertsonei elkartasuna adieraztea ere bilatzen dutela jakinarazi zuten; eta hirugarren helburua proiektua aurrera eramateko erabiltzen ari den metodoa salatzea dela gaineratu zuten: «proiektua garatzeko erabiltzen ari den inposaketa iritzi publikoaren aurrean salatzea da helburua».
Egun osoko egitaraua, larunbaterako
Ekimenaren harira, K-AHT-EAK Txikitu eguna antolatu dute larunbatean, eta atzo ezagutarazi zuten egitaraua. Goizeko 12:00etan, argitaratu berri duten txostena aurkeztuko dute, AHTren aurkako mugimendua eta errepresioa: ibilbide politikoa eta historikoa izenekoa. Ondoren, 14:30etan, Tilosetan bilduko dira bazkaltzera; bertan, Gurrutxaga eta Mancisidor bertsolariak ariko dira bertsotan. Arratsalderako berriz, manifestazioa antolatu dute; 19:00etan aterako da, Plazatik, Ez errepresiorik, ez AHTrik lemapean. Azkenik, Kop eta Estricalla taldeek kontzertua eskainiko dute Gaztetxean, 23:00etatik aurrera. Bazkarirako eta kontzertuetarako sarrerak salgai daude, Garin, Goiz Argi eta Aker tabernetan. Prentsaurrean dei egin zieten AHTren aurka dauden guztiei larunbateko ekitaldietan parte hartzera.
Errepresioaren aurkako txostena, ibilbide politikoa eta historikoa azaltzeko
Talde berriaz gain, egin berri duten txostena ere aurkeztu zuten atzo prentsaurrean: errepresioaren aurkako txostena deitzen diote, eta AHTren aurkako mugimendua eta errepresioa: ibilbide politikoa eta historikoa izena du. Azaldu zutenez, AHTren inguruan izandako «errepresioa eta kriminalizazioa» bere osotasunean bildu nahi zuten txostenean, eta horretarako, oposizioaren partehartzea eskatu zuten. Ondorioz, adierazi zuten, lan hau «jende askoren ahaleginez» osatua dagoela.
Txostenak 54 orrialde ditu eta bost euroan salduko dute, Euskal Herri mailan; lekuak zehazteko daude. Atalei dagokienez, txostena sei ataletan dago banatuta: hitzaurrea; gaiak (prentsa, kanpinak, ekintzak....); kronologia errepresiboa; balorazio juridikoa; hausnarketa eta ondorioak; eta gehigarria.
Txostena saltzen lortutako dirua «errepresioaren aurkako ekitaldietan eta enkausatuei laguntzeko» erabiliko dutela gaineratu zuten. Azkenik, txosten hau oraindik bukatu gabe zegoela azpimarratu zuten: «zoritxarrez, txosten hau bukatu gabe dago, bai baitakigu errepresio gehiago izango dela, eta gertatutako kasu askoren ondorioak oraindik kaleratzeko daudela».