Hamaikabat alderdiak dio hondakinak biltzeko konpetentziaren inguruko epaia oraindik ez dela eman eta alkateak itxaron egin beharko lukeela ezer esan aurretik.
«Alkateak kontu haundiagoarekin egin beharko lituzke balorazioak. EAEko Auzitegi Nagusiak kautelazko neurria bakarrik utzi du bertan behera. Konpetentzien inguruko epaia oraindik ez da eman eta itxaron egin beharko luke ezer esan aurretik», azaldu du Hernaniko Hamaikabat alderdiak.
Donostiako Auzitegiak suspenditu egin zuen azaroan, Hernanik San Markotik konpetentziak hartzea hondakinak biltzeko, konpetentziak zeinenak diren esango duen epai definitiboa eman bitartean. EAEko Auzitegi Nagusiak, berriz, bertan behera utzi zuen orain bi aste kautelazko neurri hori. Marian Beitialarrangoitia alkatea pozik agertu zen ebazpenarekin eta Atez Atekoaren aurkako erasoek huts egin zutela azaldu zuen.
Dena dela, epaiak epai, Hamaikabatek argi dio Atez Atekoa salatzen jarraituko dutela «sistema garestia delako eta ez delako eraginkorra eta osasungarria». Garbitaniari buruzko azalpenak eskatzen ere jarraituko dutela dio.
Eta gaineratu du: «Marian Beitialarrangoitia gogoan izango dugu Hernaniko alkaterik okerrena izateagatik».
Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!