«Zorionak Hernani! Zorionak zuen konfidantza gugan jarri eta Bilduri bozka eman diozuen guztiei. Eskerrik asko Hernani! Eskerrik asko garaipen hau posible egin duzuen guztiei eta ahalegina egin duzuenei; denen ahaleginak batuta gehiengo osoa lortu dugulako», eskerrak eman ditu Bildu koalizioak, prentsa ohar bidez. Gehiengo osoa lortuta, ahalegina orain beraiei dagokiela gaineratu du eta lanerako prest eta gogoz dagoela lan taldea. Ahalegin horretan, laguntza beharko dutela nabarmendu du: «laguntza eskatuko dugu eta zuen parte hartzea eskertuko dugu. Hernaniarren parte hartzea beharko dugu auzotan, kulturan, ingurugiroan, kirolean, merkataritzan, hezkuntzan... eta beste hainbat esparrutan eta egitasmo orokor zein zehatzetan. Zuekin egin beharko dugu lan Hernani hobea izan dadin eta horretarako bideak eta eskaintzak landuko ditugu».
Gatazka gainditzeko, ilusioa
Bilduk Euskal Herrian lortutako emaitzak historikoak eta oso garrantzitsuak direla azpimarratu du, «honek bizi dugun gatazka gainditzeko prozesua babesten duelako eta ilusioa eta gogoa dakarrelako gure herrira. Beraz, bildu gurekin lanera», egin du dei.