hernaniko eta Euskal Herriko beste 65 udaletako hizkuntz politikak aztertu ditu Euskararen Gizarte Erakundeen Kontseiluak, 2010ean. Hernaniko Udalak 7,39 puntu lortu ditu azterketan, eta aztertutako Udalen artean 14garren postua eskuratu du. Emaitzaren nondik norakoak Maite Indak azaldu zituen, azterketaren arduradunak, maiatzaren 12an.
Udalak 2006an baino
puntuazio hobea jaso du,
0,65 gehiago
Kontseiluak 2006an egin zuen lehenengo neurketa, eta joan den urtean, 2010ean bigarrena. Kasu honetan, Euskal Herri osoko 66 Udal aztertu zituen, eta Hernaniri 14garren postua eman zion, 7,39 punturekin; 2006an baino 0,65 gehiago. Aprobatzeko, 1 eta 10erako puntuazioan, 7ko nota eskatzen da; muga hori gainditzeak adierazten du Udalak euskarari ematen diola lehentasuna.
Azterketa egiteko,
galdeketa zabala
Azterketa egiterako garaian, galdeketa zabala egiten du Kontseiluak. Batetik, esaterako, Udalak emandako datu batzuk jasotzen ditu, eskatutako dokumentazioa tarteko; eta bestetik, herriko talde batzuetatik jasotzen du informazioa: euskaltegiak, euskera elkarteak, ikastetxeak, etab. Datu hauek kontrastatzeko berriz, beste bide batzuk erabiltzen ditu: argazkiak, dendetako errotuloak, kartelak, seinaleak... Telefono deiak eta Udal departamentuetara bisitak ere egiten ditu, harrera zein hizkuntzatan egiten den frogatzeko, edo Udal inprimakiak zein hizkuntzatan dauden ikusteko.
Udaleko puntu fuerte bat: euskara planak Udaleko
langile guztietan eragitea
Emaitzak azaltzerakoan, Maite Inda Kontseiluko ordezkariak Udalaren puntu fuerteak nabarmendu zituen, horien artean ondorengo bostak: bat, langile berriak kontratatzerakoan, lanpostua betetzeko beharrezkoa den euskera maila eskatzea; bi, dagoeneko euskeraz funtzionatzen duten departamentuak egotea; hiru, Udaleko euskera planak udaleko langile guztietan eragitea; lau, hala nahi duten herritarrek euskerazko inprimakiak eskura izatea; eta bost, euskalgintzako talde ezberdinei diruz edo azpiegiturez laguntzea.
Udalak balorazio puntu berriak sartzea eskatu dio Kontseiluari
Hobetu beharreko puntuak ere azaldu zituen Kontseiluko arduradunak, eta horietako batzuek eztabaida sortu zuten. Hobetu beharrekoen artean esaterako, Udalak Euskararen Ordenantzarik ez izatea nabarmendu zuen Kontseiluak. Udaleko ordezkariek desadostasuna azaldu zuten, eta adierazi zuten Udalak gaur egun badauzkala irizpide batzuk, Plenoak onartutakoak, Kontseiluak proposatzen dituen Ordenantzak baino aurrerago doazenak. Bestalde, Udaleko ordezkariek azaldu zuten Kontseiluak euskara neurtzeko erabiltzen dituen metodoak ezin dituela detaile asko neurtu; esaterako, paperean hartutako neurriak zenbateraino betetzen diren praktikan, edo Udaleko langileek zenbateraino funtzionatzen duten euskeraz. Horregatik, balorazio puntu berriak sartzea eskatu diote Kontseiluari.