Donostiako Auzitegiak suspenditu egin zuen Hernanik San Markotik konpetentziak hartzea, konpetentziak zeinenak diren esango duen epai definitiboa eman bitartean. EAEko Auzitegi Nagusiak bertan behera utzi du kautelazko neurri hori.
Hernanik jarraituko du hondakinak atez ate biltzen, EAEko Auzitegi Nagusiaren epaiaren arabera. Donostiako Udalak aurkeztutako salaketa medio, Donostiako Auzitegiak, 2010eko azaroan, suspenditu egin zuen, Hernanik hondakinak biltzeko konpetentziak hartzea San Markotik, konpetentzia horiek zeinenak diren esango duen epai definitiboa eman bitartean. Donostiako Auzitegiaren erabaki horren aurka helegitea jarri zuten Hernani, Usurbil eta Oiartzungo Udalek eta EAEko Auzitegi Nagusiak helegitea onartu eta bertan behera utzi du kautelazko neurri hori. Behin betiko epaia eman arte Hernanik jarraituko du hondakinak biltzen. Auzitegi Nagusiak hartutako ebazpenaren kontra ezin da helegiterik jarri.
Marian Beitialarrangoitia Hernaniko alkateak pozik hartu du ebazpena. Hala azaldu du Kronikara bidalitako prentsa oharrean: «Mota askotako erasoak jasan ditugu, alderdi batzuenak, zenbait komunikabiderenak eta erakunde batzuenak, baina azkenean guztiek huts egin dute; oinarririk ez dutela erakusten dute horrelako ebazpenek. Aldi berean, ebazpena Donostiako Udalari esaten ari zaio ez dela nor San Marko eta Hernaniko Udalaren arteko harremanetan sartzeko».