Hernaniko EAk, prentsa ohar bidez, konfirmatu egin du igandeko Udal eta Foru Hauteskundeei begira, Eusko Alkartasunak Alternatiba eta independenteekin batera osatu duen Bildu koalizioaren aldeko apustua. Halaxe gogorarazi die hernaniarrei, eta oso modu berezian, aurrekoetan EAren aldeko bozka eman duten lagun guztiei. «Bildu osatzera eraman gaituen apustu politikoa subiranisten arteko akordioan datza, bide baketsuak, politikoak eta demokratikoak soilik erabiltzeko konpromisoan, hain zuzen ere, bake eta normalizazio politikorako bidean Bildu berme nagusia izan dadin». Hori horrela, gaineratu du: «Baztertu beraz, egunotan beste alderdi batetik EAren izena erabiliz bozka eskatzen dabiltzanak, horiexek baitira eserleku eroso baten truke eta itzal gozoaren bila EAtik alde egin zutenak. EAn tinko eutsi diegu beti gure sorreratik izan ditugun oinarrizko helburuei, eta tinko eutsiko diegu, beti egin dugun bezala, gaur eta duela 25 urte, Garaikoetxea buru genuela, jaio ginenean».