Mendi lasterketa Ereñotzun, Oindira igo eta jaitsi, zein azkarrago

paraje ederretan korrika ibili nahi duenak, ekainaren 5ean aukera paregabea du Ereñotzun. Mendi Lasterketa antolatu du Ereñotzuko Kirol Elkarteak, Oindira igo eta jai­tsi, 12,7 km-ko proba, eta ia dena korrika egiteko modukoa. Dena prest dago Ere­ño­tzun, eta festa egun ederra izatea es­pe­ro dute (40-50 lagun inguru ariko dira lanean). Apuntatzeko aukera badago, Ibai Mendi kirol den­dan, edo www.herrikrossa.com helbidean, 7 euroan.

Helburua, auzo giroa

Ereñotzuko jendea bildu eta festa egun bat antolatu nahi izan dute, lasterketa honekin: «Ereñotzun festa pixka bat jarri nahi genuen, eta horre­gatik antolatu dugu batez ere, auzo-giroa sortzeko».

Munixko, Zuluetako gaina... paraje ikusgarriak

Ibilbide dotorea jarri dute antolatzaileek, parte hartzaileek gozatu dezaten proba egiten ari direla. Hala dio, antolatzaile lanetan ibili den Mikel Ote­gik. «Leku ederrak asko ditu ibil­bide honek: Zuluetako gai­na ez da oso ezaguna, eta ederra da; Munixko, zer esanik ez... hortik Hernani aldera za­tozela ere, itsasoa ikusiz jaisten zara... Leku kuriosoak ere ba­daude: Argurutzen adibidez, gurutzea dago harkaitzean grabatua; Fagollaga inguruan berriz, Gernikako arbola deitzen zaion haritza dago, harresi txiki batez inguratua, eta haritz famatuaren kimu batetik aterea omen dena... bide gorria ere hortxe daukagu». Ibilbide errex xamarra jar­ri nahi zuten antolatzaileek, korrika egiteko modukoa, eta inguruko jendea animatzeko modukoa, «guk nahi genuke inguru honetan korrika ibil­tzen diren guztiak anima­tzea». Saltsa pixka bat sortu dela ere aitortu dio Otegik Kronikari, «badakigu batzuk animatu direla, eta elkarrekin erronkan ere ari da jendea, Hernani eta Ereñotzu inguruan».

Sariak, parte hartzaile guztiei

5 bat lagun ari dira dena antolatzen, 6 hilabetez, eta 40-50 lagun inguru mugituko omen dira lasterketa egunean. Ho­rrez gain, sariak jarri dituzte 40tik gora dendek. Ibai-Men­dik, adibidez, kamixeta, kan­tin­plora eta 10 euroko bonoa emango die parte har­tzaile guztiei. Anto­latzaileek eskerrak eman nahi dizkie denei.

DATU BATZUK

Ibilbidea: 12,74 km
Altuera haundiena: 549 m
Irteerako altuera: 42 m
Desnibel metatua: 630 m
Zailtasun maila: Ertaina
Noiz: ekainak 5
Ordua: 10:30
Non: Ereñotzu

Ibilbidea:
Ereñotzu,
Abillats, Zulueta, Zuluetako gaina, Oindiko bi tontorrak, Munixko, Argurutze, Gasaren eraikina, Lepatxiki-Perrapa, Usategieta, Gernikako arbola-Fagollaga, Bidegorria, Ereñotzu

Izenematea:
* Ibai Mendi kirol dendan
* www.herrikrossa.com
* Irteera puntuan,
10:00ak arte
Prezioa: 7 euro

Informazio gehiago:
* www.herrikrossa.com
* http://eu.wikiloc.com/wikiloc/view.do?id=1407854