Helburua beteta. Hernaniko Teklan Laser saskibaloi taldeak denboraldi hasieran jarri zuen helburua bete du; hau da, lehenengo mailara igotzea. Gaur jokatuko du denboraldiko azken partidua, baina irabazi edo galdu igoera segurua da. Izan ere, lehenengo hiru postuetan geratzen diren taldeak igoko dira eta Hernanik 46 puntu ditu, atzetik dauzka puntu batera, Easo Zahar eta Leihoak Zarauzko taldea, eta laugarrenak, Soraluzek, 43 puntu dauzka.
Hernanik sekulako denboraldia egin du. Lau partidu bakarrik galdu ditu eta gainerako guztiak irabazi. Gaur, denboraldia ezinhobeto bukatzeko aukera dauka, Aloña Mendi ez baita arerio zaila. Norgehiagoka 16:00etan izango da, Oñatin.
Yone Boutiquek irabaziz agurtu nahi du denboraldia
Areto futboleko Yone Boutique taldeak ere gaur bukatuko du denboraldia. Zaldibiko Tellatuberri taldearen aurka jokatuko du, 18:30etan, Hernaniko kiroldegian. Hernaniarrek ez dute ezer jokoan, baina irabaziz agurtu nahi dute denboraldia.