aralar alderdia Hernaniko osteguneko ferian izan zen atzo, eta etorkinen eskubideak izan zituen hizpide. Jatorria, dena delakoa izanda ere, pertsona guztien giza eskubideak errespetatuak izan behar direla aldarrikatu zuen: «Ez dago pertsona ilegalik, ezin da egon paperik gabeko pertsonarik. Eskubide kontua da, eta ez karitate kontua». Aralarren iritziz, «erakundeetatik eta bereziki, Foru Aldunditik, etorkinak integratzeko ereduak huts egin du neurri haundi batean, eta eredua aldatu egin behar da». Pertsona guztien integrazioan, prestakuntza eta formakuntza dela gakoa dio, «beraien bizitza proiektua bideratzeko, gaitasunak garatu ditzaten», eta ondo prestatutako hezitzaileen sarea behar dela. Horrekin lotuta, gaineratu zuen, adin txikikoekin hasitako bidea ezin dela eten berauek 18 urte betetzean eta integrazioa 18 urtetik gorakoentzat sendotu beharra dagoela.
Lorcari elkartasuna
Atzo Hernanin bildutako aralarkideek, samina eta elkartasuna adierazi zizkieten Lorcako lurrikaretan izandako hildakoen senide eta gertukoei.