Eusko Ikaskuntzak Fuentes Documentales Medievales del País Vasco bilduman, euskal artxiboetako Erdi Aroko fondo garrantzitsuenetako transkribapenak argitaratzen ditu eta bihar, bilduma horretako 142garren alea aurkeztuko dute Hernaniko udaletxean. Ale horretan, Hernaniko Udal Artxiboko 41 dokumenturen transkripzioak bildu dira. 1379 eta 1527 urte bitarteko dokumentu horiek, Erdi Aroan Hernani nolakoa zen agertzen dute. Aurkezpena 19:00etan izango da.
Bertan izango dira, Marian Beitialarrangoitia alkatea, Mª Rosa Ayerbe (Eusko Ikaskuntzaren Fuentes Documentales Medievales del País Vasco bildumaren zuzendaria) eta lanaren egileak: Victor Herrero eta Montse Fernandez.
Urumea bailara
kontrolatzeko liskarrak
Aurrez esan bezala, 1379 eta 1527 urte bitarteko dokumentuak bildu dira bihar aurkeztuko duten lan horretan eta, besteak beste, Urumea bailara kontrolatzeko liskarren berri jakin daiteke. Nekazaritza eta industriari begira, aukera haundiak eskaintzen zituen eremu honek eta berau kontrolatzeko lehian aritu ziren Hernani eta San Sebastian hiribilduak, eta oligarkia industriala (oñaztarren bandokoa eta Alcega familia ordezkari nagusia zuena) eta Iruñeko Apezpikutza.
Transkribatutako azken dokumentua 1527koa da, eta gordetzen den lehenengo errolda da, alkabala zerga-ordaintzaileen lehen errolda, hain zuzen.