Maiatzaren 7an, urtebete beteko da Atez Atekoa Hernanin martxan jarri zenetik eta urteurrena ospatzeko, ekintza ezberdinak antolatu dituzte Hernanin Zero Zabor taldeak eta herriko zenbait talde eta elkartek. Ostegunean eta larunbatean izango dira ekintzak: ostegunean hitzaldia, eta larunbatean egun osoko festa.
Hitzaldia Incineracion y Salud gaiaren inguruan izango da eta Julia San Jose medikuak emango du, gazteleraz. San Jose Bidasoako ospitalean ari da lanean eta azken urte hauetan ezaguna egin da eman dituen hitzaldiengatik. Hondakinen errausketak gizakiaren osasunean eragiten dituen kalteei buruzko azalpenak eman izan ditu. Grupo de Estudios Incineracion y Salud taldeko kidea da. Hitzaldia 19:30etan izango da Biterin.
Egun osoko festa,
larunbatean
Maiatzaren 7a larunbata da eta ekitaldi nagusia egun horretan izango da. Horretarako, egun osoko festa antolatu dute, Plaza Berrin. Goizeko 11:00etatik aurrera, tailerrak, bertsoak, musika, dantza, hamaiketakoa... izango dira.