«DENOK hiritar izateko, denok izan behar dugu eguneroko erabakien parte. Hiri bateko parte, bizilagun, orduan bakarrik izaten baikara hiritar. Onartezina da, urteak joan, urteak etorri, gure artean bizi, lan egin, gozatu eta penatzen direnak kanpoan uztea, Udalak hautatzerako orduan. Denok Hiritar alderdiaren helburua da, jaioterria kontuan izan gabe, gizakien eskubideak aldarrikatzea, hala nola, boto eskubidea». Hala azaldu zuen atzo Damian Pedrosa Denok Hiritar alderdiko zerrendaburuak, Biterin egindako aurkezpenean.
«Hernaniar ugari
Udal hauteskundeetatik
kanpo geratuko dira»
Aurkezpenean azaldu zutenez, kanpoan jaio izanagatik, Gipuzkoan urte luzeetan bizi diren hainbat hiritarrek ez dute boto eskubiderik izango datozen hauteskundeetan: «gure auzoak, herriak, hiriak aurrera ateratzeko, bizilagun guztion partaidetza ezinbestekoa da. Gure etorkizuna eraikitzeko, gure arteko gorabeherak libreki eztabaidatzeko, nahitaezkoa da bertan bizi direnekin batera jokatzea. Hala ere, gurekin urte luzeetan bizi diren horiek ez dute boto eskubiderik izango maiatzaren 22ko hauteskundeetan; eta ezta Udaleko partaide izateko eta Udal politiketan eragina edukitzeko».
«Bazterkeriak gizarte
guztiarengan du eragina»
Atzo adierazi zutenez, askok uste dute inmigranteengan bakarrik duela eragina, hauek bozkatzeko eskubiderik ez izateak; baina ez dela horrela: «inmigranteei egiten zaien bazterkeria ez da beraien kontua bakarrik; gizarte osoarengan du eragina, eta guztiei dagokie aurre egitea. Gure ustez, boto eskubidea bezelako funtsezko eskaera batek hiritar guztiak ukitzen ditu. Hau da, populazioaren zati bat boto eskubidetik apartatzearekin batera, demokraziaren mugak murrizten dira».
«Inmigranteek egindako lana, eta bertakoek
emandako languntza
ezinbestekoa izan da»
Aurkezpenaren bukaeran, azpimarratu zuten integrazioa ezinbestekoa dela: «guk gizarte integratzailea nahi dugu. Norberaren jatorriko herrialdea, kultura edo erlijioa kontuan hartu gabe, eskubide berdinekin onartuko gaituzten gizartea nahi dugu; denok bizilagun izan behar dugu». Azkenik, eskerrak eman zizkieten proiektu hau aurrera erametako lan izugarria egin duten inmigranteei eta bertakoei. Eta baita ere, Denok Hiritar alderdiari atxiki diren 50 herritar ilustreei.