Martxo erdialdean hasi ziren lehendabiziko zizak. Hasieran gutxi izaten da, eta halako prezioa egiten du azokan: kiloa 120-180 euroan saldu dute hasieran. Ugaritzen ari da orain, eta merkatzen ari da prezioa. Lehengo astean kiloa 30-40 euroan erosi ahal izan zen; eta osteguneko ferian aukera polita izango dute hernaniarrek, askoren ustez perretxikoen erregea dena erosteko.
Onttoak ere martxo erdialdean hasi ziren. Hasieran 35 euroan saldu zuten kiloa, eta orain jaisten ari da, ugaritu ahala: 28-30 euro egin zuen joan den astean onttorik onenak; txikia 15 euroan ere saldu zuten.
Ziza eta onttoa, kapritxo eder bat, udaberrian
Zenbait mokofin, garai honetxen zain izaten da, lehendabiziko Udaberriko Zizak probatzeko. Udaberriko Zizak beti izan du aparteko estimazioa, sukaldarien artean, eta abar. Ziza-zuria ere deitzen zaio, eta Ordizian eta Gasteizen asko saltzen da, Mikel Lasa saltzaileak dioenez. «Gasteiz da, batez ere, Udaberriko Ziza gehien saltzen dugun plaza. Ordizia ere plaza ona da. Bi azoka horietan, jendeak berak erosten du ziza. Hernaniko azokan, berriz, onttoak estimazioa haundiagoa du. Ziza ekartzen dugu, baina onttoak tiradizo haundiagoa du». Mikel Lasa hernaniarra izango da, seguru asko, Euskal Herrian perretxiko gehientsuena saltzen duena. Onttoa ere urteko hilabete askotan saltzen du Lasak. «Ontto freskoa ia urte guztian saldu liteke gaur egun. Guk 8-9 hilabetez saltzen dugu. Martxoan hasi da aurten, eta abendura bitarte izango da, nahikoa aukera».
«Ziza-leku ona zen lehen Hernani»
Lasak dioenez, Udaberriko Ziza bertakoa eta kanpokoa saltzen dute. Hernaniko belazeetan ere biltzen omen dute ziza, baina leku asko galduta omen daude. «Nekazaritza moduagatik-eta, ziza-leku asko galdu egin dira Hernanin». Belazeetan pixa botatzeak, adibidez, erre egin ditu ziza-leku asko. Dena dela, ba omen dira, oraindik, Hernanin zizak biltzen dituztenak; non, akaso esango dizute...
Mikel lasa - Saltzailea:
«Osteguneko ferian Udaberriko Zizak emango ditugu, probatzeko, Karlos Ezeizak prestatuta»
Mikel Lasa hernaniarrak Udaberriko Zizak emango ditu datorren ostegunean, Hernaniko ferian. «Karlos Ezeizak prestatuko ditu, eta 11:30etan emango ditugu, jendeak probatu ditzan; mokadurik ederrenetako bat da ziza! Udaberriko Ziza oso estimatua da Ordizian edo Gasteizko azokan, baina Hernanin ez du halako estimaziorik. Ea jendeari harra pizten diogun!».