«Torneo azkarra izango da, eta helburua da ikuslea hasieratik bukaerara engantxatzea. Berezitasuna da finalerdiak eta finala frontoi motzean eta luzean jokatuko direla, joan etorrian. Parte hartuko duten 12 pelotariak momentuko onenak dira (Koteto Ezkurra lesionatuta dago), eta bikoteak osatzerako orduan berdintasuna bilatu da. Batzuk hobeto moldatzen dira frontoi luzean, eta besteak motzean. Torneo ona izatea espero dugu», hala aurkeztu zuen atzo Kike Elizaldek Udaberriko Torneo Mixtoa. Hilabeteko iraupena izango du Torneoak, gaur hasi eta eta maiatzaren 21a arte. Hiru fasetan jokatuko da: final laurdenak ligaxka bidez jokatuko dira, finalerdiak joan-etorrian (frontoi motzean partidu bat eta luzean bestea), eta finala ere joan-etorrian.
Final laurdenetan,
hiru partidu jokatuko dituzte
Final laurdenetan, sei bikoteak bi taldetan banatuta egongo dira: A taldean, Matxin III-Urrutia, Juaristi-Lizaso, eta Uterga-San Miguel; eta B taldean, Zeberio II-Ion, Urriza-Olazar eta Urtasun-Etxeberria III. Txapelketako fase honetan, hiru partidu jokatuko dituzte talde bakoitzeko, hau da, guztiek guztien kontra jokatuko dute.
Final laurdenak 3 egunetan jokatuko dira, bi partidu eguneko, guztiak Galarretan. Gaurko jaialdia 16:00etan hasiko da, eta bi partidu hauek jokatuko dira: Juaristi-Lizaso/Urtasun-San Miguel eta Zeberio II-Ion Urtasun-Etxeberria III. Final laurdenetako gainontzeko partiduak larunbatean eta astelehenean jokatuko dira.
Finalerdiak joan-etorrian: Galarretan, Iruritan eta Lekunberrin
Finalerdietako partiduak joan-etorrian jokatuko dira: joanekoak Iruritan edo Lekunberrin, eta bueltakoak Galarretan. Partiduak apirilaren 30an, maiatzaren 1, 7 eta 8an jokatu dira. Finalera tantu gehien lortzen dituen bikotea pasako da.
Finalak, maiatzaren
14 eta 21ean
Finala ere bi partidutara jokatuko da: maiatzaren 14an Santestebanen, eta 21ean Galarretan. Txapelduna puntu gehien lortzen dituena izango da.