OSTIRALEAN hasi zituen Udalak Hernaniko trafikoa aldatzeko lanak, hiru kale norabidez aldatuta: Montebideo, Florida eta Oriamendi kaleak. Trafiko aldaketek gaur izango dute jarraipena, eta eguerdian, Udalak, beste lau kaleren norabidea aldatuko du: Latsunbe, Latsunbe Berri, Txillida eta Nafar kalekoak hain zuzen.
Lau kaleak zentzuz aldatzeko semaforo berriak jarriko dituzte Latsunbe, Latsunbe Berri eta Argarain inguruan, eta hauek jarrita hasiko dira ondorengo kanbioak egiten:
Latsunbe Berri kalea norabide bakarrekoa izango da Marielutseraino.
Latsunbe kalea ere norabide bakarrekoa izango da Elkano eta Argarain kaleen artean. Hau da, Elkano kalean eskubira hartzeko aukera izango da, Argarain kaleko bidegurutzeraino. Autobusek berriz, orain arteko norabidea mantenduko dute, eta horretarako bide bat mantenduko da, Elkanorantz.
Eduardo Txillida pasealekua ere zentzuz aldatuko da, eta gaurtik aurrera, Antziolarako norabidea izango du.
Azkenik, Nafar kalearen norabidea aldatuko dute. Gaur eguerditik aurrera Elkanon sartuko dira kotxeak Nafar kalera, eta Izpizuan aterako dira.
Gainontzeko aldaketak bihar, eta ostegunean
Udala pixkanaka ari da egiten aldaketak, eta biharkoan Antziola kalea aldatuko dute norabidez. Gainontzeko aldaketak ostegunean egingo dituzte.