otsoa artalde barruan sartzea da, erlazainentzat, liztor asiatikoa erlauntzan sartzea. Hernaniko Baserritxo etxeko (Elizatxo) erlauntza huts batean, kabia egiten hasia zen liztor asiatikoa, erleak jaten dituen liztorra. Agustin Zabala erlazainak harrapatu zuen joan den astean; 7 arrautza jarriak zituen ordurako. Liztor asiatikoak harrapatzen ari dira Hernanin, eta erlazainek diote, espero zutena baino gehiago dagoela. Dagoeneko 9 harrapatuak dituzte, eta Aranon ere harrapatu dute bat. Hasieran konfusioak izan dira, bertako liztorrak harrapatu dituztelako tranpetan.
Kabia egiten hasiak dira
Liztorrak paperezko kabia egiten du, zelulosazkoa; liztor asiatikoak ere bai. Erreginak egiten du hasierako kabia, eta txikia egiten du. Hor langile batzuk hazi, eta hortik leku haundiago baten bila joaten dira. Hasierako kabi txiki hori da, hain zuzen, Agustin Zabala erlazain hernaniarrak harrapatu duena, eta oraindik garbi asko ikusten dira arrautzak bertan. «Erlauntza artean, badut bat, hutsa dagoena, eta hantxe sartzen ikusi nuen erregina. Harrapatu, nolabait, eta konturatu nintzen kabia egiten hasia zela».
Uste baino liztor gehiago...
Iaz iritsi zen liztor asiatikoa Gipuzkoara, eta Hernanira ere iritsi zela bazekiten. Orain ari dira ikusten erlazainak, zenbateraino zabaldua dagoen. Hernanin 9 erregina harrapatu dituzte: Elizatxon 3, Ereñotzun 1, Alkatxuinen 3, eta Larre-Gainen 2. Aranon 1 harrapatu dute, Abañon.
Tranpa, liztor guztientzat
Erlazainek kanpoko liztorrei jarri dizkiete tranpak, baina itxura denez, bertako liztor-erreginak ere erortzen dira haietan. Horrek konfusioak ere sortu ditu, tankerakoak direlako bi liztorrak, neurri aldetik batez ere (bertakoa pittin bat haundiagoa da).