Ekuador, Bolibia, Txile, Mendebaldeko Sahara, Kolonbia, Honduras, Argentina, Txina, Marruekos, Moldabia, Nikaragua, Peru, Kuba, Mongolia, Cachemira... Herrialde horietako jaki ezberdinak probatzeko aukera izango da bihar, Hernanitik mugitu ere egin gabe. Izan ere, Amher Hernaniko Elkarte Multikulturalak Elkartasunezko Jaialdia antolatu du bihar. Eguerdiko 12:00etatik aurrera izango da, Plaza Berrin (euria egingo balu, Atsegindegin). Amher elkarteak azaldu duenez, «ekintza honen helburu nagusiena da, beste askoren artean, kohesio sozialean aurrera pausoak ematea eta euskal gizartean, pluralitatea eta dibertsitatearen errespetua oinarri izatea, edozein dela ere, bakoitzaren nazionalitatea. Izan ere, arrazismoak ez gaitu bide onera eramango».
Musika eta Bidezko Merkataritza,
besteak beste
Biharko jaialdian, protagonismo nagusia munduko herrialde ezberdinetako jakiek izango badute ere, musika ere ez da faltako jaialdia girotzeko.
Horrez gain, Bidezko Merkataritzako postua egongo da.
Bestalde, Amherren laguntzaile-bazkide izan nahi duenarentzat mahai bat egongo da, eta bertan, baita ere, eskuragarri egongo da hiruhilabetero hernaniar etorkin guztiei bidaltzen zaien Kaixo aldizkaria. Guztia, Plaza Berrin, bihar.