iritsi da euskeraren aldeko egun haundia. Bihar goizaldean helduko da Korrika Hernanira Astigarragatik, eta 50 minutu inguruan, Hernaniko kale gehienak zeharkatuko ditu. AEKko antolatzaileak azaldu dutenez, Martindegira 04:08ak aldera iristea aurreikusten da, nahiz eta, ohiko moduan, ordu zehatz bat jartzea ia ezinezkoa den. Oialumeko errotondan hartuko du lekukoa Hernaniko aurreneko taldeak, eta metroz metro, 30 aldiz eskualdatuko da. Aurten, orain bi urte baino bost talde gehiagok erosi dute kilometroa, 30ek hain zuzen: Martindegi, AMR, Neska korrikalariak, Udaleko langileak, Koxka elkartea, Irakasle omenduak, Molotoff, Gazte Asanblada, San Joan Konpartsa, Urumea, Elizatxo, Inmakulada, Batxiller, Langile DBH, Langile LH, Haur Eskola, Ereñotzu, Udal Euskaltegia, Dobera-Kronika, Bertso Eskola, AEK, Kantuz, Urumea, Ttarla, Udala, Ezker Abertzalea, AAM, Mendiriz Mendi, Orona eta Errugbi taldeak. Korrika iritsi aurretik, AEKk Hernaniko ikastolen sorreran parte hartutakoak omenduko ditu, 03:50ak aldera Zinkoenean. Ondoren, ikastola haietako lehenengo ikasleak izan zirenek eramango dute lekukoa.
Iritsiera girotzeko: afaria, gaubela eta kalejira
Korrika goizaldean iritsiko dela kontuan izanda, Gazte Asanblada eta San Joan Konpartsa arduratu dira hernaniarrak esna mantenduko dituen ekitaldiak antolatzeaz: gaueko 21:00etatik aurrera, afaria eta gaubela izango dira Kontrakantxan, Gazte Asanbladak antolatuta; eta 03:30etan kalejira, San Joan Konpartsarekin. Azken hauek azaldu dutenez, deialdia luzatzen diete hernaniarrei Korrikarekin bat egin, eta goizaldeko 03:30etan Plazan azaltzeko: «San Joan Konpartsak ere bat egin du Korrikarekin, eta ongi etorria emango diogu kalejirarekin».
Korrika gaur, eskoletan
Herriko txikienek ere, Korrikan parte hartzeko aukera izango dute gaur. Haur Eskolako umeak 10:00etan aterako dira; herriko gazteak Korrika Gaztean aterako dira, 11:30etan; eta txikiek Korrika Txikian hartuko dute parte, 15:00etan. Ondoren, Txokolatada izango dute Plazan.