«Euskadiko Orkestan jotzeko, asko entsaiatu behar da etxean»

«Entsaiatzeko denbora ez dakit nondik aterako dudan. Euskadiko Orkestarekin lehenengo aldiz joko dut, eta etxean asko en­tsaiatu behar izaten dugu». Onintza Albeniz hernaniarrak harpa jotzen du, eta Eus­kadiko Orkesta Txikian ariko da, datozen emanaldietan. Hurrengo kontzertua, maia­tzaren 21ean dute, 19:00­etan, Gasteizko Kontser­ba­torioan. Elkarrekin entsaia­tzen ere hasiak dira: «entsaio bat elkarrekin egin dugu, eta laster asteburu osorako elkartuko gara. Gai­ne­rakoa, etxean egiten dugu».
Albenizek, gustoko du harpa. Olatz Zugasti entzun zuen behin, harpa jotzen, eta horrek piztu omen zion harra, instrumentu hori jotzeko. 13 urte ditu Albenizek, eta Do­nos­tiako Kontserbatorioan ari da, 8 urte zituenetik. Bere adinean, punta-puntan ari da Albeniz. 2008an Estatu mailako Sari Nagusia irabazi zuen, Madrilen; 2009an Bigarren Saria, Sevillan. Orain, Euska­diko Orkestarako deitu diote, eta disko bat ere atera dute, Harpa Airean, Kontserbato­rio­ko ikasleekin batera. Disko horretan, gainera, Aroia Ariz­mendi hernaniarrak flauta trabeseroa jotzen du. 12 euroan dago salgai, Elkarren.

Johann Pachelbelen Canon-a
Albenizek dioenez, musika klasikoa jotzen dute batez ere, eta berak gustokoen duena Pachel­belen Canona da. «En­tzuteko ede­rra da, eta jotzeko ere bai». Beste musika estilo batzuk ere gustatzen zaizkio Albenizi: «denbora librean, 40 Principales entzuten dut, batez ere».
Albeniz entzun nahi duenak, aukera izango du:
-Maiatzak 1, 12:30­etan, Donostiako Udalean.
-Maiatzak 21, 19:00etan Gasteizko Kontserbatorioan.
-Maiatzak 27, 20:00etan, Alderdi Ederren.
-Harpa Airean, disko aurkezpena: apirilak 14, 19:00­etan, FNACen.