Suzko lilia, jazza eta poemak uztartzen dituen emanaldia izango da bihar, Kontrakantxa gaztetxean, Korrika Kulturalaren barruan. Hedoi Etxartek argitaratutako poema liburuan oinarrituta, Etxartek berak eta Andoni Arcillak olerki errezitaldia egingo dute jazzaren laguntzaz. Arcillarekin batera, Hasier Oleaga eta David Ruiz arduratuko dira musikaz. Emanaldia 19:30etan izango da. Suzko Lilia poesia liburua 2008ko irailean argitaratu zuen Hedoi Etxartek (Susa 2008) eta maitasuna dago poemen sakonean.
Beharra eta gogoa
iristean esan zenidan
`isiltasuna ere musika da`
entsaladaren aurretik
`hutsunea ere espazioa da`
ostean
`beltza ere kolorea da`
kafean
`operazioa egitean min egiten badizute ere
sendatzeko tenorean gertatzen da hori`
alde egin baino lehen esan zenidan
`adarrak jarri nizkizun
baina zu bakarrik zaitut maite`