Aralar alderdiak, maiatzeko Udal hauteskundeetan Hernaniko zerrendaburuak izango direnak eta berauek landuko duten programa aurkeztu zituen atzo. Ernesto Merino hernaniarra izango da zerrendaburua, Donostialdeko zerrendaburu ere izango dena, eta Xabier Peñagarikano zerrendako bigarrena izango da; hernaniarra baita ere. Landuko duten programaren barruan, Babes Ofizialeko Etxebizitzek eta batez ere, alokairu sozialekoek garrantzia berezia dute. Hala azaldu zuen Merinok: «Poliki-poliki lehentasuna eman behar zaie alokairu sozialeko etxebizitzei jabego pribatuko etxebizitza sozialen gainetik. Herrian eraikitzen diren etxebizitzen %80, gutxienez, babes ofizialekoak izatea bultzatuko dugu eta horietatik %50 gutxienez, alokairu sozialekoak. Horrez gain, Babes Ofizialeko Etxebizitzak bizitza osorako izan daitezela bultzatuko dugu».
«Politika ezkertiar eta ausartak bultzatuko dituen Ezker Abertzalea»
Hernani herri anitza dela azaldu zuen Merinok eta aniztasun horretatik abiatuta, Ezker Abertzalea ulertzeko eta garatzeko beste modu bat eskaini nahi dietela herritarrei: «Giza eskubide guztiekin konprometitutako Ezker Abertzale integratzailea, herritarren eguneroko arazoei irtenbideak bilatuko dizkiena eta politika ezkertiar eta ausartak bultzatuko dituena, hitzaren eta konbentzimenduaren bitartez». Bide horretan, 8 arlo landuko dituzte, batez ere: etxebizitza, enplegua, gizarte zerbitzuak, euskera, ingurumena, kontratazio politika, partaidetza eta berdintasuna. Enpleguari begira, Udalak langabezian dauden herritarrei lan merkatuan sartzen lagundu behar diela azpimarratu zuen Aralarreko zerrendaburuak: «izaera sozialagoa duten enpresa motak sustatu eta babestu behar dira eta herriko merkataritza modu berezian lagundu», gaineratu zuen. Gizarte Zerbitzuei dagokienean, ezberdintasun sozialak ahalik eta txikienak izatea da Aralarren helburua: «proposatzen dugu Eskubide Sozialen Hernaniko Karta aldarrikatzea». Eta euskerari lotuta, «herritar eleanitzez osatutako Hernani euskaldunaren alde egiten dugu eta euskeraren erabilera indartzeko, lan horretan diharduten eragileekin elkarlana bultzatuko dugu».
Atez Atekoa hobetzeko, inkestako iritziak baliatu
Ingurumen arloan, Atez Atekoa ere izan zuten hizketagai. Aralarreko zerrendaburuek argi utzi zuten beronen aldekoak direla eta sistemarekin jarraitu behar dela, baina hobekuntzekin. Horretarako, Udalak egindako inkestan ateratako iritziez baliatu behar dela nabarmendu zuten. Horrez gain, bultzatu nahi dute «eraikin publikoetan energia berriztagarriak, eta osasungarria den eta kutsatzen ez duen garraioa».