«Garbitania enpresa publikoak egin dituen kontratazioen prozedurari buruzko informazioa eskatzen dugu, tartean, Usurbilen ANVko zinegotzi eta San Marko Mankomunitateko lehendakariorde izandakoarena, Imanol Azpiroz jaunarena», halaxe azaldu zuten atzo prentsaurrean, Hernani, Usurbil eta Oiartzungo Hamaikabateko ordezkariek: Iñaki Arratibel, Luis Mari Ormaetxea eta Xanet Arozena. Otsailean informazio hori eskatu zutela jakinarazi zuten eta ez dutela erantzunik jaso. Garbitania sortu zenetik informazio falta eta iluntasuna direla nagusi, gaineratu zuten.
«Azpiroz jaunak bere burua kontratatu duen
susmoa daukagu»
Ezagutu dituzten kontratazioen artetik, Imanol Azpirozenak harridura sortu diela azaldu zuten eta susmoa dutela Azpirozek bere burua kontratatu ote duen edo bere kontseilari izaera bere burua kontratatzeko erabili ote duen. «Azpiroz Garbitaniako administrazio kontseiluko kide da eta bereziki egoera honek behartzen gaitu, honen eta besteen kontratazioei buruzko informazioa eskatzera». Hamaikabateko ordezkariek argi utzi zuten, informazio guztia lortu arte, ez dutela etsiko.