Andoni Amonarraizek argi du zein izango den datorren legegintzaldiko helburu nagusia, EAJ-PNVk Hernaniko Alkatetza lortzen badu: «Atez Atekoa eta Santa Barbaran dagoen hondakinen transferentzia estazioa kentzea». Halaxe azaldu zuen atzo, Hernaniko Batzokian, EAJ-PNV alderdiak egin zuen aurkezpen ekitaldian. Amonarraiz, maiatzaren 22an izango diren Udal hauteskundeetarako Hernaniko alkategaia izango da. Atez Atekoari lotuta, auditoria bat martxan jarriko luketeela gaineratu zuen eta irregulartasunak egonez gero, auzitegietara joko luketeela. Joseba Egibar Gipuzku Buru Batzarreko presidentea ere bertan izan zen.
«Azken lau urte hauetan
txikitutakoa konpontzeko, aldaketa»
Amonarraizek azpimarratu zuen, Hernani aldaketa sakon baten beharrean dagoela eta iritsi dela «bizi duen apatia-egoeratik ateratzeko unea. Horixe da hauteskunde hauen bidez lortu nahi duguna: konplexurik gabeko aldaketa, EAJ alderdia alkatetzara eramango duen aldaketa, azken lau urte hauetan txikitutako guztia konpontzea ekarriko duena».
Horri lotuta, legegintzaldi honi buruzko hausnarketaren berri eman zuen: «Ezker Abertzaleak eta Ezker Batuak gobernatutako legegintzaldian gezurra eta prepotentzia izan dira nagusi». Horrez gain, kritikatu zuen parte hartzeaz hitz egin dutela askotan, baina erabaki asko EBren abstentzioarekin eta Alkatearen kalitatezko botoarekin onartu direla, hala nola, aurrekontuak, Txantxillako etxebizitzetako listak eta mugikortasun plana. «Atez Atekoa jarri aurretik erreferenduma egiteko eskatzen zuten 6.000 sinadura ere gutxietsi zituzten», nabarmendu zuen. Eta Ezker Abertzalearen eta EBren gezurrik haundiena Atez Atekoa dela gaineratu zuen: «hondakinen %31,4 desagertu da eta San Markorekin eta Atez Atekoarekin 2.345.806 euro gastatu ditugu 2010 urtean».
Bost helburu
EAJk alkatetza lortuko balu, Atez Atekoa kentzeaz gain, bost helburu izango lituzke legegintzaldi honek, Amonarraizen arabera: «gastuak murriztea, gardentasunez jokatzea, zerbitzuak hobetzea, aberastasuna sortzea eta bakea lortzea».
EAJ-PNVren 5 ardatzak:
Gastua murriztuko dugu:
- Kontseilari finkoak eta libreki izendatutako langileak desagertuko dira. Funtzionarioekin bakarrik agintzea posible dela erakutsiko dugu. Alkatearen eta zinegotzi liberatuen soldata EUDELek proposatutakoa baino %10 txikiagoa izango da.
Gertutasuna eta gardentasuna hernaniarrekin:
- Partehartzea auzo elkarteen bidez izango da; eskaera eta kontsulta guztiei erantzungo diegu; partehartzeko Organuak sortuko ditugu; Udaleko web orrian foroa jarriko dugu.
Zerbitzuak hobetuko ditugu:
- Zerbitzu Publikoak: Garbitaniatik ateratzeko tramiteak hasiko ditugu, 5. kontenedorea jarriko dugu eta pixkanaka 6. (olioarentzat); zakurrentzako guneak prestatzea aztertuko dugu; herritarrekin eta merkatariekin adostutako trafiko aldaketak egingo ditugu.
- Hirigintza: Papeleran, azpiko pasoa egin beharrean, Florida bukaeran, gaineko pasoa egingo da; promotoreei etxebizitzak nahi direnei adjudikatzeko aukera ematen dien hitzarmenik ez da sinatuko, Txantxillarekin gertatu bezala; olfatometria bat egingo da; eta finantziazioa lortzen saiatuko gara.
- Politika soziala: kooperaziora zuzendutako dirua hernaniarrek gestionatzea nahi dugu. Esaterako, Olaran, Balda eta Osari zuzenduko diegu.
- Kirola: klubetatik gertuago egongo gara eta bertako kirola babestuko dugu; kiroldegia antolatuko dugu; plater-tirorako gune bat bilatuko dugu.
- Kultura: bertako produktuak bultzatuko ditugu; kalitatezko ibilbide bat sortuko dugu; gure inguruko jaialdietan parte hartzen saiatuko gara (Jazzaldia, Hamabostaldia...)
Aberastasuna sortuko dugu:
- Hernaniko enpresa eta profesionalak erabiliko ditugu, batez ere; Plaza bultzatuko dugu Kaxkoan mugimendua sortzeko; Txotx denboraldian tabernen irekiera ordutegia aurreratuko dugu; merkataritzan, Tolosa hartuko dugu eredutzat.
Elkarbizitza normalizatzearen alde:
- Lokarri eta Gesto por la Pazekin egingo dugu lan, besteak beste