liztor asiatikoaren kontrako gerra oraintxe hasi dute erlazainek. Negua lo pasa ostean, orain esnatu dira erreginak, eta horietako bat harrapatu zuen ostiral arratsaldean Agustin Zabala erlazain hernaniarrak, Elizatxon, Baserritxo etxeko lurretan. 4 cm inguru ditu, eta etxean egindako tranpan harrapatu du.
Hernanin kabi bat
Liztor asiatikoak erleak jaten ditu, eta erlauntza oso-osoak bukatu ditzake. 2004an iritsi zen Frantziara, eta han sarraski haundiak egiten ari da. Iaz Gipuzkoa eta Nafarroara iritsi zen. 14 kabi aurkitu dituzte Gipuzkoa ekialdean, eta horietako bat, Hernanin, Portutik Urnietako bidean.
Gipuzkoako erlazainek ostegunean izan zuten bilera, gai honi buruz. Udaberri honetan, Irunen harrapatu dute aurreneko erregina, eta Hernanikoa da bigarrena. Liztorra frenatzeko garaia oraintxe da, erlazainek diotenez, eta tranpak jarriak dituzte. Kabi bakoitzetik 10 liztor bakarrik geratzen dira bizirik (denak erreginak). Udaberrian, erregina horiek kabi berriak egiten hasiko dira, eta maiatza bitarte harrapatu behar dira denak. Hernanin, 10 bat erregina egongo dira, eta horietako bati, behintzat, familia izateko ametsak bukatu zaizkio.