Gipuzkoako ibaietan, Urumean barne, arrantza denboraldia bihar hasiko da eta uztailaren 31 artekoa izango da. Beste lurraldeetan egin den moduan, hemen ere atzeratu egin da denboraldiaren hasiera. Arrantza kupoa, hau da, arrantzaleek gehienez harrapatu ditzaketen amuarrainen kopurua, iazko bera da: 3 amuarrain egun bakoitzeko. Arrantzatutako amuarrainaren gutxieneko eta gehieneko neurria ere mantendu egin da: 22 eta 35 cm artekoak izan behar dute. Horrez gain, ibaietako amuarrain populazioa babesteko asmoz, Gipuzkoako Foru Aldundiak aurreko denboraldian ezarritako gune debekatuak eta heriotzarik gabeko guneak bere horretan jarraituko dute. Urumean hiru gunetan egin ahalko da arrantza: Lastaolako zubitik Ereñotzuko zentraleraino, Ereñotzuko presatik Bezkieta baserriraino eta hegoaldeko bariantearen zubitik behera dauden uretan.
Amuarrain kopurua, igo
Amuarrainaren egoerari dagokionez, Diputazioak emandako datuen arabera, haunditu egin da espezie horren kopurua Gipuzkoako ibaietan. Jarraipen lana egiten duenetik, 1994tik, aurtengoa da bigarren urterik onena. Eta ibaietara iritsi diren izoki atlantikoen kopurua ere nabarmentzekoa da, aurtengoa baita Urumeara izoki gehien sartu den denboraldia. Guztira: 223.