Hernaniko denda txikiek ospakizunetarako eguna izan zuten martxoaren 20a. Izan ere, Eusko Jaurlaritzak Kalitatearen Q Ziurtagiria eman zien Hernaniko 14 dendari; Merkalitatea Q Ziurtagiria, hain zuzen, UNE 175 001 araua betetzeagatik. Denda horiek, bezeroa arretaz hartu eta zerbitzua kalitatez eta profesionaltasunez ematen dutela bermatzen du ziurtagiri horrek. Aurten, Hernaniko 14 dendek jaso dute ziurtagiria, baina aurretik beste 3k ere bazuten. Beraz, Hernanin 17 denda daude guztira kalitatezko zerbitzua ziurtatzen dutenak. Eta guztiak, Berriak Hernaniko merkatari eta ostalarien elkarteko kideak dira. Eusko Jaurlaritzak, denera, Gipuzkoa, Bizkaia eta Arabako 100 denda txikiri eman zien ziurtagiria. 100 dendetatik 14 Hernanikoak izateaz gain, Gipuzkoatik bigarren herria izan da Hernani ziurtagiri gehien jaso dituena eta guztietatik laugarrena, Gasteiz, Basauri eta Zumaiaren atzetik. Berriak elkarteak nabarmentzeko datuak direla aipatu du eta argi geratu dela Hernanin, bezeroak zaintzen dituzten kalitatezko dendak daudela.
Berriak elkarteak bultzatuta
Merkalitatea Ziurtagiria, oinarrizko maila da Kalitatearen Q Ziurtagiriaren barruan. Ondoren etorriko lirateke, bikaintasun ziurtagiria, brontzezkoa, zilarrezkoa eta urrezkoa. Merkatariek beraiek egiten dute eskaera ebaluatuak izateko, beraiek erabakitzen dute kalitatearen ziurtagiria eskuratu nahi dutela eta hori lortzeko prozesua martxan jartzen da. Orain arte Hernaniko hiru komertziok bakarrik zuten emana pausua eta kolpera 14 izatearen arrazoia, Berriak elkarteak egindako lana izan da, besteak beste. Iñigo Martinez elkarteko dinamizatzaileak dendaz denda egindako deiek parte hartzera animatu dituzte dendariak.
6 orduko ikastaroa
Behin ziurtagiria lortzea helburu, 6 orduko ikastaro bat eman zien dendariei formakuntzaz arduratzen den enpresa batek. Bertan azaldu zitzaizkien ziurtagiria lortzeko betebeharreko araua zein zen (UNE 175 001). Ikastaroa egin ondoren, enpresako kide batek eskaera egindako 14 dendak bisitatu zituen eta ziurtagiria lortzeko zer hobetu behar zuten azaldu zien. Hala nola: irekitzeko lizentzia izatea, emergentzi irteera adierazita egotea, ordutegia ikusteko moduan izatea… Eta prozesua bukatzeko, bezero misteriotsua pasa zen. Bezero misteriotsu hori ez da identifikatzen, dendan sartzen da, eskaera bat egiten du eta hala, berak ebaluatzen du araua betetzen duen denda horrek edo ez eta ziurtagiria eman behar zaion edo ez.
Hernanin, aurten, eskaera egindako 14 dendek lortu dute ziurtagiria eta aurrera begira denda gehiago animatzeko helburua du Berriak elkarteak.
Merkalitatea Q Ziurtagiria duten Hernaniko dendak:
1.- Jaione Konjelatuak
2.- Galerias Buen Precio
3.- Marna
4.- Amegar etxetresnak
5.- Kuluxka
6.- Apain
7.- Hoki lentzeria
8.- On Bit informatika
9.- Antziola okindegia
10.- Portalondo estankoa
11.- Pagola estankoa
12.- Valen
13.- Kaixo
14.- Ilazki
15.- Torres argazki denda
16.- J. F. Cocinas
17.- Masusta ekodenda