Nolakoa izan ote zen orain dela 100 bat urte Hernaniko Musika Bandak eskaini zuen emanaldi bat? Zein uniforme eramaten ote zituzten orain dela 50 urte? Eta nolako instrumentuak erabiltzen ote zituzten? Zeintzuk ote ziren hasierako Bandako kideak?
Galdera horiek eta gehiago argitzeko aukera dago egun hauetan Biterin. Izan ere, bertan, Musika Bandari buruzko erakusketa dago ikusgai. Bandak 150 urte betetzen ditu aurten eta ospakizunen artean antolatu dute erakusketa. Apirilaren 6ra arte egongo da ikusgai. Ordutegia honakoa: astelehenetik ostiralera, arratsaldeko 18:00etatik 20:00etara eta larunbatetan, goizeko 11:00etatik 13:00etara.
Lau ataletan banatua
Erakusketa lau ataletan banatua dago. Alde batetik, 150 argazkiekin bideo montaje bat egin dute eta etengabe eskaintzen ari dira. Bestetik, Musika Bandak 60 urte hauetan erabilitako uniformeen erakusketa dago; horretarako maniki batzuk jantzi dituzte. Hirugarren atalean, Bandaren historiaren laburpen bat egin dute aukeratutako 35 argazkirekin. Eta laugarren atalean, berriz, urte hauetan Bandan erabilitako hainbat musika tresna ezagutzeko aukera dago.
Herritarrak animatzeko deia
Erakusketa zabalik dagoen bitartean, beti egongo da Bandako partaideren bat sor-tzen diren zalantzak edo argazkietan agertzen diren pertsonak zeintzuk diren argitzen laguntzeko.
Bandak herritarrak erakusketarekin gozatzera animatzeko deia egin du «bertako familia askok izan baitute kideren bat bandako partaide».
Horrez gain, eskerrak eman nahi dizkiete erakusketan lagundu dieten guztiei: «etxeetan gordeta zeuzkaten argazki eta uniformeak utzi dizkigutenei, Berriak elkarteari manikiak lortzeagatik, udal artxiboko arduradunari gurekin izandako begiruneagatik eta Torres argazki dendari egin duen lan ederragatik».