«AIZKORRIN disfrutatzera aterako gara; lasaiago, eta gozatzera. Asmoa hori da behintzat. Egia da, gero, dortsala jazten dugunean, denak konpetitibo bihurtzen garela, eta gu biok ere bai», dio Zigor Iturrietak, parrez. Santamariak ez du ezezkorik esan. Iturrieta eta Santamaria onentsuenen artean dabiltza mendi lasterketetan, eta gutxi edo gehiago, begiz jota dituzte aurten egingo dituzten karrerak: Iturrietak 15 bat egingo omen ditu, eta Santamariak 12 inguru.
Zigor Iturrieta, North Face-k patrozinatuta
Indartsu hasi du denboraldia Zigor Iturrietak, Gran Canariako UltraTraila irabazi baitu, 123 km-koa, joan den astean. Iturrieta Hernanin bizi da, eta harro dio Eubakoa dela, denak zornotzarra dela dioten arren. «Hemen Ereñotzu bezala, han Euba daukagu».
Karrera luzeetan bikain ibiltzen da bizkaitarra, eta aurten North Face-k patrozinatu dituen 4 europearretako bat da. Iaz urte bikaina egin zuen, Mont Blanc-eko Ultra Trailean hirugarren postua lortu zuen, besteak beste.
Aurten 4 lasterketa luze begiz jota zituen. Lehenengoa irabazi egin du, Gran Canariakoa, eta gainerako hirurak ere topera disputatuko omen ditu: Lavaredokoa (Dolomitak, 90 km); Mont Blanc-ekoa (Alpeak, 166 km); eta La Diagonale des Fous (Isla Reunion, 163 km). Azken horrek Eroen diagonala, deskribitu lezake, kirolari horiek egiten duten esfortzua. 20-24 orduz egiten baitute korrika, mendian.
Lau proba nagusi horiez gain, beste 10 bat proba motzago ere egingo omen ditu Iturrietak. «Preparaziorako beharrezkoa da konpetizioko karrera batzuk egitea. Eta horregatik aterako naiz Aizkorrikoan, eta agian Adarrakoan ere bai, datorren astean».
Unai Santamaria, poliki hasi eta indartsu bukatu
Orion hasiko du denboraldia Unai Santamaria hernaniarrak. Iaz Euskadiko Kopan bigarren postua lortu zuen. Aurten Kopako karrerak ez zaizkio hain egoki tokatu, eta beste helburu batzuk jarri ditu.
Karrera motzagoak eta azkarragoak komeni zaizkio Santamariari, «korrika asko egin litekeenak». Udaberrian sei bat korrituko ditu, eta udazkenean beste batzuk. Udan lasaiago ibiliko omen da. Denboraldia lasai hasi eta indartsu bukatu ohi du hernaniarrak, karrerak bezalaxe. «Lasai ateratzea gustatzen zait karreretan ere. Lasai hasi, eta pixkanaka ahal dena mejoratzen joan».
Oraingoz begiz joak dituen karrerak: Orio, Arratzu, Zegama, Bera, Lakuntza (iaz irabazi egin zuen), Irun, Orreaga, Sorginen lasterketa...
Ereñotzun, ekainean
Aurten lehenengo aldiz egingo da Hernanin mendi lasterketa bat. Ereñotzu-Oindi lasterketak 12,7 km izango ditu, eta ekainaren 5ean egingo dute. Iturrietak eta Santamariak oraindik ez dakite lasterketan izango diren, baina pozgarria dela diote, mugimendu hori herrian sortzea.
Pultsometroa, GPS eta guzti
Aurrerapenak iritsi dira mendi lasterketen mundura ere. Azkena, GPS eta guztiko pultsometroa. Entrenamendu eta karreretan ibiltzen dute, eta bataz bestekoak ateratzeko primerako inbentoa dela diote. Hori gabe, «galduta» ibiliko lirateke, Santamariaren esanetan.