DONOSTIAKO 5garren Instrukzioko Epaitegiak artxibatu egin du Marian Beitialarrangoitia Alkateak Buruntzaldeko Hamaikabateko ordezkariei (tartean Iñaki Arratibel) jarritako salaketa, hala azaldu du Hamaikabatek Kronikara bidalitako prentsa oharrean.
Alderdiak dio, Alkateak salaketa jarri zuela Hamaikabatek diptiko batean argitaratutako biñeta batengatik: «biñetan kritikatzen da Alkateak izandako jarrera Txantxillako etxe tasatuak adjudikatzeko orduan. Alkateak ez du , Txantxillako etxeen adjudikazioa gogoratu araziko dion ezer nahi. Lotsa ematen dio kalitatezko botoa erabili izana oposizioko zinegotzi bat gaixo zegoen bitartean. Boto horrekin onartu zen etxe tasatua izango zutenen lista, eta hori gogoratu araziko dion guztiaren kontra egingo du».
Hamaikabeten ustez, Alkateak ez zuen onartu agerian uzten zion karikatura, eta kalean Txantxullori buruz hitz egiten dela ikusteak sumindu egiten du: «Epaileak berak, eramandako dokumentazioa baloratuta, ondorengoa esan zuen: ´Hernaniko herritarren iritzia erakusten duen karikatura da`.
«Bi urteko kartzela zigorra izan dezaketen delituak leporatu nahi zizkigun»
Iñaki Arratibel eta Hamaikabeteko ordezkariak martxoaren 16an izan ziren epailearen aurrean, eta bertan, Alkatearen jokaera politikoak kritikatzeko eskubidea aldarrikatu zuten: «politikoki inmorala iruditzen zaiguna esateko eskubidea, isilik ez geratzeko dugun eskubidea aldarrikatu genuen. Aste berean esaterako, Europako Giza Eskubideen Auzitegiak Arnaldo Otegiren inguruko sententzia eman zuen, eta Espainia kondenatu zuen aldez aurretik Arnaldo Otegi kondenatu izanagatik. Alkateak guri leporatutako delituak bi urteko kartzela zigorra izan dezake».
Azkenik, Arratibelek gaineratu du salaketak erakusten duela Alkateak bere gestioa kritikatzen duen guztia isilarazi nahi duela, eta horren adibide dela, besteak beste, foroa itxi izana.