Merkatuan da Label sagardoa, %100 bertako sagarrarekin egina

Label ziurtagiria duen sa­gardoa merkatuan da, atzotik. Aurten 860.000 litro jarri nahi dituzte salgai, ziurtagiri ho­rrekin. Bertako sagarrarekin egindako sa­gar­doa; prozesu osoa ziurtatuta daukana, hasi sa­gas­titik eta botilan sartu arte. 27 sagardogile daude Eus­­ko Labelean: Ara­bako 1, Biz­kaiko 7 eta Gi­puz­­koako 19; tartean, Her­na­niko Ipa­rra­girre eta Itsas­bu­ru sagardotegiak.

Usurbilgo Saizar sagardotegian aurkeztu zuten atzo Eusko Label sagardoa, 200 lagunen aurrean. Bertan zi­ren Eusko Jaurlaritzako eta Kali­ta­tea Fun­da­zioko arduradunak, eta hiru he­rrial­dee­tako sagardogileen elkarteko lehendakariak: Arantxa Eguz­kitza (Gi­puz­koa), Jose Anto­nio Zama­lloa (Bizkaia), eta Juan Jose Pe­ciña (Araba). Di­pu­­t­a­zioko ar­duradunak, Uda­le­takoak, sa­gar­dogileak, komunikabideak eta hainbat herritar ere bertan izan ziren.

Bertakoa, eta kalitatezkoa
Sagardo bikaina, eta bertako sagarrarekin egina. Hori da Labeldun sagardoa. «%100 bertako sagarrarekin egina da; hori ziurtatua dago, eta baita kalitate oneneko produktua dela ere. Produktua hasieratik kontrolatu dugu, eta aurten 860.000 litro daude barriketan, prezintatuta. Enboteilatzeko, analitikak eta kata bat egingo ditugu 3 astean behin, eta hori gaindituz gero aterako dira merkatura», adierazi zuen Amaia Luquín-ek, Kalitatea Fundazioko Zuzendariak.  

Kalitatea Fundazioak ema­ten du Label ziurtagiria. Orain arte, 13 euskal produktuk zu­ten Labela, eta sagardoa izan da 14garrena.

Potentzialitate haundia
Aurten 860.000 litro egin dira Labelerako, baina bertako sa­gar-uzta askoz haundiagoa izan da; 6-7 miloi kilo sagar, alegia. Horrek esan nahi du, potentzialitate haundia daukala produktuak, oraindik.
Arantxa Eguzki­tzak gehiago ere esan zuen: «sagardogile eta ba­serritarrei eragingo die pau­su honek, bertan lan egiteko aukera emango dielako. Mi­­la­ka urte dituen produktu ho­nen bidean, beste katebegi bat bes­terik ez da hau, etorkizun opa­ro baten alde».