Lau kofrade berriek ilusioz hartu dute sagardoaren alde egin beharreko lana

Tolarea Gipuzkoako Sa­gar­do Naturalaren Kofradiak, atzotik lau kofrade berri ditu sagardoaren alde lan egiteko prest. Eta ez nolanahiko kofradeak. Bertsolaritza eta gastronomia ondo ezagutzen duten kofradeak dira eta bi arlo horiek sagardoarekin duten lotura ezagututa, ziur behar bezala babestuko dutela sagardoa. Hain zuzen, Antton Garin Olegario eta Julian Ezeiza Aterpe bertsolari hernaniarrak, Elena Arzak sukaldari donostiarra eta Joxe Mari Gorro­txategi gozogile tolosarra izendatu zituzten  Ohorezko Kofra­de.
Laurek ilusioz hartu zuten ze­regin berria eta zin egin zuten beti defendatuko dutela sagardoa. Eskerrak eman zituzten «halako egun eta festa ederragatik».

Bertso eta guzti
Elena Arzak izendatu zuten ko­frade berri lehenengo, eta halaxe eman zituen eskerrak:«Nire aita ere izendatu zu­ten kofrade bere garaian eta biok sekulako poza hartzen du­gu, sagardoaren defenda­tzaile haundiak garelako, bertako produktu guztiena bezalaxe». Go­rro­­txategik sagardoaren genera­zio­koa dela azaldu zuen eta as­ko estimatzen duela be­rau: «8 ur­­te­rekin hasi nintzen sagardoa edaten eta pentsa, 82 urtetara iri­tsi naiz!», esan zuen broma artean. Aterpek ezin izan zuen ekitaldira joan eta bere ordez Mikel Armendariz senideak egin zuen zin.
Garinek, emozionatuta, ber­tsotan eskertu zuen (Habanera doinuan): «Txo­rian abestiakin, jeikia naiz gaur goizian, mendia bueltat eman det, andriarekin batian, pentsatzen ze festa edarra, gaur izango da Hernanian, hementxe alkartu gera, bai Jonen esanian, lauok poztuta gaude-ta, ia malko bat begian, hori gertatzen da kofrade, lauroi gaur izendatzian, ai ze festa edarra degu, sagardoan izenian, egun hau ez degu ahaztuko, bizi geran bitartian».
Ekitaldia bukatzeko, Ozenki abesbatzak 4 abesti eskaini zi­tuen, tartean, ACT Ligako himnoa. Urtero bezala, atzokoan ere, Euskal Herritik eta kanpotik 20 bat kofradia etorri ziren Her­nanira Tolarearen XVI. Kapitu­lura eta ekitaldiaren ondoren, guztiak Larre-Gain sagardotegira joan ziren bazkaltzera.