Chillida Leku museoa bilduma pribatu bezala mantenduko da eta behin betiko itxi dizkio ateak publikoari. Hemendik aurrera, adituek bakarrik izango dute eskulturak aztertzeko aukera. Horixe erabaki du Eduardo Chillidaren familiak, «ezinezkoa izan delako instituzioekin akordio bat lortzea». Chillidatarrek herenegun jakinarazi zuten erabakia, agiri baten bidez, eta akordiorik ez lortzearen arrazoia, honakoa dela azaldu zuten: «Eusko Jaurlaritzak eta Gipuzkoako Foru Aldundiak ezin dituzte 2009an onartu eta sinatu zituzten konpromisoak bete eta bi erakundeok beraien konpromisoetatik askatzea erabaki dugu; eta ez dugu akordio berririk behartu nahi». Chillidaren familiak hiru baldintza exigitzen ditu, eskultoreak bere garaian jarri zituenak: bere bilduma osoa mantentzea egungo lekuan, museoaren izaera monografikoa mantentzea, eta familiakideren bat ordezkari izatea etorkizuneko museoan eta beto eskubidea izatea bertan hartu zitzazketen erabakietan. Artistaren familiak azaldu duenez, azken negoziaketetan baldintza horiek zalantzan jarri dituzte bi erakundeek, «besteak beste, museoaren izaera monografikoa, bere 10 urtetan oinarri nagusia izan dena». Museoa publikoarentzat zabalik izatea bideraezina dela dio Chillida familiak, «defizitarioa delako. 2010ean 600.000 euro baino gehiago jarri behar izan genituen guk». Museoko 20 langileei lanposturik gabe geratu direla ere jakinarazi diete chillidatarrek.
Erabaki, «desleiala»
Eusko Jaurlaritzak eta Gipuzkoako Foru Aldundiak azaldutakoaren arabera, komunikabideen bidez jakin zuten chillidatarren erabakiaren berri eta ez zuten halakorik espero. Blanca Urgell Kultura sailburuak «desleial» aritu izana leporatu die chillidatarrei. yy