Hernaniko guraso askok, beraien haurrek Langile Ikastolan ikasi dezaten erabaki dute; hain zuzen, 99 haur aurre-matrikulatu dira bertan. Haur horien gurasoek jakinarazi dutenez, ordea, ikastolak 69 plaza bakarrik eman dizkie, Eusko Jaurlaritzako Hezkuntza Delegazioaren erabakiz, eta 30 haur lekurik gabe geratu dira. «Hezkuntza Delegazioak beste ikastetxe batera bideratu nahi ditu 30 haur horiek», azaldu dute. Eta beste gela bat eskatzeko sinadura bilketa hasi dutela gaineratu dute: «Guraso gehienak ez gaude ados egoerarekin eta laugarren lerro bat eskatzen dugu, hau da, beste gela bat haur horiek sartzeko. Eskaria Langile Ikastolari eta Delegaritzari egiten diogu. Blog bat sortu dugu eta sinadurak biltzen hasi gara». Blogaren helbidea honakoa da: http://laugarrenlerroalangilen.blogspot.com/.
Langilek iaz arte lau gela onartzen zituen maila bakoitzean, Delegaritzak horretarako baimenik ematen ez bazion ere. Iaz erabaki zuen Langilek hiru gela betetzeko adina ume bakarrik hartzea.
Gurasoek, herritarrei dei egiten diete laugarren lerro horren alde sinatzeko eta ekimena zabaltzeko.
Bilera, martxoaren 28an
Aurre-matrikula egin duten 99 haur horien gurasoek bilera berri bat egingo dute martxoaren 28an, 17:00etan, ikastolan.