Santurtzi, Victor Goikoetxearen begietatik

SANDIUSTERRIKO Dorretxea zahar-berritu du Victor Goi­koe­txea hernaniarrak. Bi pisuko edifizioa da, eta aurrantzean kultur etxea izango da. Santurtziko historiari begiratu dio Goikoetxeak, herriko bizibide izan diren hiru jarduera ekonomikori zehatzago esanda: nekazaritza, arrantza, eta meatzaritza. Hiru mural haundi, eta hainbat eta hainbat detaile egin ditu muralista hernaniarrak, pinturan oinarrituta, eta beste arte-estilo batzuk ere erabilita.
Gaur inauguratuko dute Santurtziko Dorretxe berritua. 12:00etan da inaugurazioa, eta ekitaldi irekia izango da, nahi duen guztiarentzat. Ber­tan izango dira Santurtziko herritarrak, arduradun po­litikoak, eta arte munduko hainbat eta hainbat gonbidatu.

Omenaldia, Santurtziko langileei
Victor Goikoetxeak egin duen lanik haundiena da Santur­tzi­koa. Hiru urte pasa ditu lan hau egiten, eta funtsean, Santurtziko langileei egindako errekonozimendu bat da;  baserritar, arrantzale, eta mehatzariei. «Santurtzi egin dutenak beraiek izan baitira. Nekazaritza ia desagertuta dago, baina garai batean se­ku­lako garrantzia izan zuen. Arrantzak eta mehatzaritzak oraintxe arte garrantzia izan dute, eta dute oraindik ere.      
Santurtziarrek beren herria ikustea nahi nuen, Dorretxera sartzen direnean: beren herritarrak, familiakoak, edo beren burua ikustea, hain zuzen».
Goikoetxeak pintura figuratiboa erabili du batez ere, dorretxea zahar-berritzeko, baina bestelako teknikak ere sartu ditu, ia arte-lan osoan.  «Materiari garrantzi haundia eman diot, testurari... barku eta baserri zaharretako egurrak, burni eta harri koloreak, argazki inpresioak...».