Azken txanpa! Hernaniko 35 arraunlarirentzat

JO eta su ari dira hernaniarrak gaurko estropada prestatzen (16:45etatik aurrera, Loiolan), eta 6 batel joango dira Hernanitik bertara; 35 arraunlari, guztira. Gipuz­koa­ko batelen liga bukatzear da, eta Aste Santura bitarte azken txanpa gogorra joko dute, talde guztiek.
Herna­ni­ko batelak lan po­lita egiten ari dira; kadeteak hirugarren dira, 20 batelen artean, eta astero-astero ari dira beren maila erakusten. Gaur izango dute susto bat emateko aukera, eurek antolatzen duten estropadan.

Kadeteak, 15 kide eta 3 batel
Talde indartsua du Hernanik kadeteetan. 15 arraunlari ari dira astero Gipuzkoako onenen artean, eta 3 batelak postu ederrak egin dituzte. Batelik onena hirugarren dijoa sailkapenean, Gipuz­koa­ko beste 20 batelen artean. Estropadarik ez dute irabazi, baina gero eta gertuago dabiltza lehen postuetatik. Joan den astean, esaterako, segundu gutxi batzuk behar izan zituzten aurrenekoa ha­rra­patzeko. Gaur ere emango dute berea, eta sustoren bat ere hartu dezake norbaitek, Loio­lako estropadan bete be­ha­rreko 1.000 metroak buka­tzerako.

Hernaniko beste 3 batel, beste 3 kategoriatan
Beste hiru batel ere baditu Hernanik, hiru kategoriatan: infantiletan bat, eta seniorretan bi: mutilena eta neskena (neskena osatzeko infantil, jubenil eta seniorrak ari dira).
Infantiletan sailkapen er­dialdean dabiltza hernaniarrak. Mutil indartsuak ditu Hernanik, eta bateletan txikiagoak hobeto moldatzen dira. Dena dela, estropada txukunak ari dira egiten, lehenengotik 20 segundu ingurura.
Senior mutiletan 6 arraunlari ari dira, txandan, eta batel bat ateratzen da asteburuero. Sailkapen erdiparean dabil­tza, eta buruan trainerillen liga daukate: 6 behar dira atera ahal izateko, eta 6 daude justu-justu. Ikusteko dago zer erabakitzen duten.
Nesketan kategoriaz kan­po ari da Hernani, baina pos­tu politak egiten ari da. In­fan­til, jubenil eta seniorrak na­has­tuta atera dute batela, eta ligako sailkapenean puntua­tzerik ez dute. Hala ere, estropadaz estropada ari dira maila ematen.

Txapelketak eta ikastaroa
Aste Santuan bukatuko dute liga, eta Gipuzkoako Txapel­ke­ta jokatuko dute. Ondoren Euskadikoa eta Espainiakoa dituzte, eta segidan trainerillen liga hasiko da. Hor bukatuko da denboraldia hernaniar gehienentzat. Hurrengo denboraldirako, ikastaroa du­te uztailean, eta dei egingo diete hernaniarrei, kirol dotore hau probatzera.