Urumea ibaian, Osiñaga auzoko Loidi inguruan, 1.250 izoki kume askatu zituen atzo, Gipuzkoako Foru Aldundiak. Urtero egin ohi du «poblazio naturala indartzeko eta berreskuratzen laguntzeko». Izoki kumeak 12 cm-koak dira. Bertan izan ziren Rafael Uribarren Landa Ingurumenaren Garapenerako diputatua, Iñigo Mendiola GFAko Natura Inguruneko teknikaria eta departamentuko basozainak. Uribarrenek azaldutakoaren arabera, «aurten lehenengo aldiz, bi marka dituzte izoki kumeek, jakiteko zenbatek lortzen duten itsasoratzea eta zenbat diren itzultzen direnak. Horrela datu gehiago izango ditugu».
«Bide onetik ari gara»
Ibaiaren egoeraren erakusle dira izokiak; izan ere, izokiak bizirauteko, ibaiak baldintza onean egon behar du eta alde horretatik, pozik egoteko arrazoiak badirela azpimarratu zuen Uribarrek: «inoiz baino izoki gehiago igo dira aurten. Urumean 223 erregistratu dira, 93tik, planarekin hasi ginenetik, urterik onena izan da. Gure lanaren fruituak ikusten ari gara».
Azaldu zuenez, lanean ari dira bi zentzutan: ibaiertzetan eta ibaietan bertan. «Presa zaharrak kentzen ari gara, eskalak sortzen izokientzat, inguruko landare exotikoak kentzen eta arrantza deportiboa kudeatzen, besteak beste».
Eta fruituak Urumean bakarrik ez, Gipuzkoako beste ibaietan ere izan dituzte. Orian 45 izoki kontrolatu dituzte eta Oiartzunen ale batzuk bigarren urtez.«Bide onetik ari garela lanean erakusten digu honek».