ZARAUTZEN, Usurbilen, Donostian, Oñatin, Astigarragan, Getarian, Orion eta gaur Hernanin; aurrera doaz Flash Mobaren entsaioak. Hernani Zero Zabor taldeak Kronikara bidalitako oharrean adierazi duenez, adin guztietako ehundaka gipuzkoar ari dira entsaioetan parte hartzen, martxoaren 20an Zubietan egingo den Flash Mob erraldoian parte hartzeko: «Zarautzen esaterako, joan den asteburuan 300 lagun bildu ziren, eta aurrekoan 400 Usurbilen».
Entsaioa gaur, Hernanin
Asteburu honetan ere, entsaioak egingo dituzte Gipuzkoako hainbat herrietan, tartean, Hernanin. Bigarren entsaioa izango da gaurkoa, eta Biteri parean egingo dute, eguerdiko 12:00etan. Eguraldi txarra egingo balu Udaleko arkupetan edo Atsegindegin egingo dute.
«Erraustegia baino alternatiba merke eta osasuntsuagoa badago»
Prentsa oharrean adierazi dutenez, Flash Mobaren bidez, erakutsi nahi dute ez daudela ados Zubietan erraustegia eraikitzearekin, eta Hernani bezalako herriek erakutsi dutela alternatiba merkeagoa eta osasuntsuagoa badagoela hondakinak tratatzeko: «beste alternatibek ez dute gipuzkoarron ekonomia 20 urterako hipotekatuko. Horregatik eskatzen dugu Gipuzkoako Foru Aldundiak 6 urtetako moratoria sinatzea, eta erraustegiaren lanak bertan behera utzi eta beste alternatibak indarrean jartzea»
Hernaniarrei deia gaurko entsaioan parte hartzeko
Aipatutako arrazoi horiengatik hain zuzen, hernaniar guztiei dei egin diete gaur Biteri parean egingo den entsaioan parte hartzera: «parte hartzeko eta deialdia zabaltzeko deia egiten diegu hernaniarrei, ahal bezain jende pila biltzeko, bai gaur, eta baita martxoaren 20an ere Zubietan».