Kaleko argi publikoen energia eraginkorragoa izateko programa jarri du martxan Udalak. Kaleetako argiteria publikoa aldatuko du Udalak, 296 puntuetakoa: Ezkiaga pasealekua, Biteri ingurua, Latsunbe Berri, Elizatxo Goikoa, Santa Barbara, Orkolaga, Elkano kalea, Sorgintxulo, Garcia Goldaraz, Karabelgo zubia eta Teileri Gain. Energiaren Euskal Erakundeak %50a ordaintzeko diru laguntza emango dio.
Errendimendu baxuko argiak kendu,
eta altukoak jarri
Udalak jakinarazi duenez, kenduko dituzten argi guztiak errendimendu baxukoak izango dira, eta hauen ordez jarriko dituzte kontsumo baxukoak edo errendimendu altukoak. Egin dituzten kalkuluen arabera, urteko 94.334,64 kw-h aurreztuko dituzte; gaur egungo energia kontsumoarekin alderatuz gero, %38,72a. Horrez gain, aldaketarekin, urtean, 30,84 tona CO2 gutxiago isuriko da atmosferara, %38,74 gutxiago. Azkenik, aldaketaren beste arrazoietako bat da argi kutsadura murriztuko dela. Udalak azaldu duenez, energia arloan bakarrik ez, diru arloan ere onurak ekarriko ditu aldaketak: «argi berriek 8,5 urteko biziraupena dutela kontuan izanda, epe horretan 73.533,93 euro aurreztuko ditu Udalak».
Lehiaketan parte hartu nahi dutenek ostiralera arte
dute aukera
Zerbitzu eta Gobernu Batzordeek onartuta, webgunean jarriko dira lehiaketako oinarriak, eta parte hartu nahi dutenek ostiralera arte dute proposamenak egiteko aukera. Guztira 118.000 eurotako lehiaketa da, BEZ barne. Jakinarazi dutenez, proiektuan jasotako lanak ekainaren 30erako bukatuta egon behar dute.