Bere errekorra hautsi du 2010ean Añarbek, energia sortzen. Kontsumitu ere asko egiten du, 26,5 GWh, baina sortu ere bai: 30,12 GWh. Donostialdeako (tartean Hernani) ur hornikuntza eta saneamendu osoa egiten du Añarbek, eta lan horietan gastatzen duen energia baino gehiago sortzen du, 3,6 GWh gehiago, alegia. Hori 2010ean lortu du, eta sobrante hori saldu egin du. Horregatik emaitza ekonomikoak ere igo egin ditu: 2007an 144.000 euro; eta 2010ean 504.000 euro.
Energia ‘garbia’
Energia berriztagarria edo garbia sortzen du Añarbek, eta horretarako hiru sistema dauzka: hidroelektrikoa, fotoboltaikoa, eta kogenerazioa. Hau da: ura, eguzkia, eta gasa. 11 zentral dauzka horretarako. Hidroelektrikoak bi: Añarbeko urtegian eta Goizuetan. Fotoboltaikoak zazpi: 7 ur-deposituren teilatuetan eguzki plakak ditu, eta horietako bat Hernanin dago (Orkolagan). Kogenerazioak bi, gasaren bidezkoak: Loiolako araztegian edo depuradoran.
Kotxe elektrikoa merkatura
GECASA enpresak edo Grupo Añarbek eman zituen datu horiek, ostiralean, martxoak 5, Energiaren Efizientziaren Nazioarteko Egunean. Aurten 18 urte bete ditu Añarbek, eta energia garbiaren aldeko apustuan segiko duela adierazi zuen. Horren adibide, laister merkatura aterako duten kotxe elektrikoa, energia-sarera konektatu daitekeen kotxea, eta soinurik eta CO2rik sortzen ez duena.