Hernanin Inauteriak bete-betean dira eta Goizuetan gaur hasiko dira. Aurreko urtetan baino egun bat lehenago hasiko dira, helduen Kaldereroekin. Aurreneko aldia da Goizuetan Kaldereroak antolatzen dituztela helduek. Kantuzale talde batek antolatu ditu eta 18:00etan abiatuko dira eskolatik. Ordu pare bateko desfilea egingo dute eta ondoren, afaria egingo dute Plazan. Talde bakoitzak bere afaria eramango du.
Bihartik aurrera,
mozorroen txanda
Goizuetako Iñoteak ofizialki bihar hasiko dira eta Mozorro taldeak ez du atsedenik izango. Bihar 22:00etan afaltzeko bilduko dira eta astelehenean, goizeko 08:00etan bi taldetan banatu eta baserriz baserri ibiliko dira, puska biltzen. Arratsaldeko 18:30ak inguruan herriratuko dira eta herritarrekin batera, poteoa egingo dute. Eta ondoren afaria, hurrengo egunerako indarrak biltzeko.
Horrez gain, arratsalde partean herrian giroa izateko, haur eta gurasoen konpartsa izango da. Aurtengo gaia: Feria de abril.
Igande eta astelehenean, Gabezin taldearen emanaldia izango da Plazan.
Asteartean, egun haundia
Asteartean goizeko 09:30etan Mozorroak gosaltzeko bilduko dira eta 10:00etan abiatuta etxez etxe ibiliko dira puska biltzen. Ondoren bazkaria egingo dute eta arratsaldeko 16:30etan, goizuetarren sinboloa den Zahagi Dantza. 20:00etatik aurrera, parranda giroa nagusi izango da, goizaldera arte. TZ taldeak lagunduko du zeregin horretan.
Kontu eguna, gaur zortzi
Gaur zortzi kontuak egiteko eguna izango dute Mozorroek. Horretarako bazkaria egingo dute eta ilunabarrean giroa jarriko du Igandea txarangak.