GAZARAKO Bidean ekimena lanean ari da Gazako blokeoa hautsi eta nazioartea palestinarren egoera larriaz kontzientziatu dadin. Ekimenarekin bi itsasontzi lortu nahi dituzte, eta horietako bat karga-ontzi bat izango litzateke; asmoa da Gazara 2.000 tona laguntza humanitario garraiatu ahal izatea. Hernaniko Kooperazio taldeak bat egin du ekimenarekin, eta Hernanin hainbat ekimen antolatu ditu laguntza humanitario horretarako dirua lortzeko.
Kaxkoan,
Miliak eta bonoak erosgai
Ekimen horietako bat gaur izango da; Kaxkoan barrena ariko dira miliak eta bonoak saltzen. Milia bakoitza 150 euroan salduko dute, eta bono bakoitza 5 euroan; azaldu dutenez, bono bakoitzarekin zementu zaku bat erosiko dute. Gaur erosteko aukerarik ez dutenentzat, hilaren 12an eta 26an ere jarriko dira.
Arkatza, koadernoa, euroa
Eskoletan egingo dute antolatuta duten beste ekimena. Eskolako materiala jasotzea da helburua, hau da, arkatz bat, koaderno bat, euro bat ume bakoitzeko.