Paul Ojuel eta Aitor Gorrotxategik Euskal Herriko Txapelketako finala jokatu zuten ostiralean, bigarren aldiz jarraian, eta oraingoan irabazita, historia egin dute; izan ere, Hernaniko pelota elkarteari irabazteko geratzen zitzaion txapelketa ofizial bakarra zen. Hernaniarrek 22-16 irabazi zieten Urbieta II-Telletxeari. Ez zen partidu ona izan, baina Hernaniko pelotariek modu praktikoan jokatu zuten, aurkarien hutsegiteak aprobetxatuz eta beharrezkoa bakarrik arriskatuz. Ojuel eta Gorrotxategi San Franciscora joango dira datorren urtean, Euskal Herriko selekzioarekin.
Bi final, datorren larunbatean
Asteburu honetan, paleta goman Euskal Herriko bi semifinal jokatu dituzte hernaniarrek eta biak irabazi dituzte. Lehenengo mailan, Amaia Irazustabarrenak eta Ariane Arrietak 30-28 irabazi zieten Contin eta Aristorenari, eta bigarren mailan, Eli Pagolak eta Maider Huizik 30-16 Mentxakatorre eta Gonzalezi. Bi bikote hernaniarrek, dagozkien finalak datorren larunbatean jokatuko dituzte, Zarautzen.
Horrez gain, Berria Txapelketako partidua jokatu da Hernanin: Irurtzun 2/Iparralde 1.