«Garapen iraunkorreko diputatua den Carlos Ormazabalen dimisioa exijitzen dugu. Berehalakoa, organikoa tratatzeko bere politika gezurretan oinarritu delako, birziklatu daitekeen materiala zabortegira botatzen ari direlako, herritarren esfortzua zabortegira botatzen ari direlako, gure organikoa jarduera baimenik ez duen zabortegira botatzen ari direlako eta Lapatxeko konpostaje planta ere, jarduera baimenik gabe erabiltzen ari direlako. Nola da posible Gipuzkoako erakunde nagusia denak, legearen zaindari izan beharko lukeenak, baimenik gabe, azpiegiturak erabiltzea?», hala azaldu zuten atzo prentsaurrean, Marian Beitialarrangoitia, Xabier Mikel Errekondo eta Aitor Etxeberria Hernaniko, Usurbilgo eta Oiartzungo alkateek. Esandakoa ziurtatzeko, datuak eman zituzten: «2010ean 4.004 tonelada organiko bildu ziren Lapatxen. Horietatik %71,5 atez ate biltzen dugun herriok lortu genuen eta %28,5 bosgarren kontenedorea daukaten herriek. Beraiek esandakoaren arabera, Lapatxek gehienez, 2.500 T bildu ditzake urtean. Beraz, Lapatxeko konpostaje plantak ezin dio aurre egin dagoen eskariari. Eta ondorioztatzen da organikoa zabortegira botatzen ari direla Lapatxen. Bildutakoaren %40, ia erdia. Gainera Diputazioak lotsarik gabe esaten du konpostatzeko beste plantarik ez dela behar, ez dituela berak aurreikusitako beste konpostatzeko plantak egingo eta hori gure ustez oso oso grabea da».
«Non dago gure konposta?»
Hiru Udaletako alkateek gaineratu dute ez dietela utzi Lapatxera eramandako organikoaren jarraipena egiten. «2009tik 5.000 T inguru organiko bidali ditugu hiru udalerrien artean. Hortik zero gramo konposta jaso ditugu bueltan. Non dago gure konposta? Ez digute jarraipenik egiten utzi, ez digute daturik eman, ez zer egin den esan...».
«Eskatzen diogu politika oker hori zuzendu dezala»
Diputazioak Atez Atekoa bultzatzea eskatzen dute: «Datuek argi uzten dute organikoari dagokionez, Diputazioak bere buruari jarritako emaitzara hurbiltzeko Atez Atekoa dela sistemarik eraginkorrena. Orain frogatzen ari da 5garren kontenedorea, itxura egiteko bakarrik erabili duela Diputazioak. Ormazabalek egin duen gauza bakarra da, Atez Atekoa iraindu, desprestigiatu, oztopatu... errauste planta toxiko bat justifikatu nahian». Horrez gain, Diputazioari eskatzen diote «itxurakerian oinarrituz darabilen politika oker hori zuzendu dezala, Gipuzkoa garbi eta osasuntsuago bat eraikitzeko bidean instituzioen arteko elkarlanak oinarri izan behar baitu, inposizioa erabili beharrean. Eta horretarako elkarlanerako eskua luzatua du».