arantzazun hamaiketako ederra egiten ari zen Don Eulogio apaiza, Margaritarenean. Non dago paradisua, Don Eulogio? Galdetu, eta «hementxe, Margarita, hementxe» erantzun omen zion. Bernardo Atxagaren hitzak dira, joan den martxoan Bilbon esanak, poesia errezitaldi batean. Gaur, errezitaldi hori, Paradisuaz izenekoa, Hernanin eskainiko du; gastronomiatik abiatu eta paradisuari buruz ariko da, umore ikutu haundiarekin, 20:00etatik aurrera, Biterin. Jabier Muguruza musikaria izango du lagun Bernardo Atxagak. Joan den astean aurkeztu zuten emanaldi hau, Hernani’n Musik egitarauaren barruan, eta Muguruza bertan izan zen. «Umorea nagusi da, nahiz eta umore beltz xamarra izan, zenbait momentutan, pixka bat mikatza ere bai. Poesia ez da beti iluna eta tristea». Postal gastronomiko batetik abiatu, eta hemengo gauzekin loturak egingo ditu Atxagak; hain bereak dituen pertsonaiak erabilita, eta hain berea duen ironiak lagunduta. Joxan Goikoetxeak Musika Eskolako zuzendariak aurkeztu zuen emanaldia, eta hala jarri zituen hitz hauek Atxagaren ahotan: «Hernanin hasiko dugu erreboluzioa».
Kantak, antzerkirako
konposatutakoak
Jabier Muguruzak bere kantuak joko ditu batipat. «Gehienak nireak dira. Batzuk antzerkirako daude konposatuta, eta beste batzuk bestela... adibidez, azken diskokoa badago bat Hor nonbait izena duena, eta hori joko dut. Kantu batzuk jo, eta zeozer abestu behar bada ere zeozer abestuko dut, zurrumurru batzuk badira ere».
Sarrerak, gehienak salduta
Sarrera gehienak salduta daude. Biteritik Kronikari jakinarazi diotenez, batzuk geratzen dira oraindik, eta gaur egun guztian egongo dira salgai, agortu arte, 6,65 euroan.