ahtren kontrako taldeak prentsa oharra bidali du Kronikara eta bertan dio, expropiazioak otsaila bukaeran hasiko direla. «Hernanira Fomento Ministeritzakoak otsailaren 24, 25 eta 28an etorriko dira. 3 egunetan expropiatuko dituzte Hernaniko 114 lur zatiak».
Bi deialdi, expropiazioak salatzeko
Hori salatzeko, AHTren kontrako taldeak dei egin du bi mugimendutan parte hartzeko. Batetik, otsailaren 23an herri batzarra egingo dute informazioa emateko, 19:30etan Kontrakantxan. Bestetik, otsailaren 24an, goizeko 08:30etan kontzentrazioa egingo dute Gudarien plazan, eta ikastetxeetan paro deialdia egin dute ordu horretarako.
10 hektareako subestazioa
Hernanin 10 hektareako subestazio elektrikoa egingo dute, Osiñagan, eta AHTren kontrako taldeak dioenez, bertatik 400.000 Vko argi-linea aterako da, AHTari indarra emateko.
Gastu ekonomiko izugarria du AHTak, prentsa oharrean adierazi dutenez: «herritar bakoitzeko 4.790 euroko gastua du AHTak. Krisi garai honetan, murriztu dituzte partida asko eta asko baina AHTarena ez dute zalantzan jarri. Gaur egun, aurrekontu hori betetzeko arazoak izango dituzte. Begibistakoa da, Bizkaian, esate baterako, tramo batzuk geldirik daude, kontuak ez zaizkielako ondo ateratzen».