´Zapateroren 426 euroak` deitutako laguntza moztuko dutela duela hilabete batzuk jakin zen. Laguntza hau bideratzen duen egitasmoa, PRODI izenekoa, ez dute gehiago luzatuko. Herritar askori kezka eta nahasmena eragin digu. Zein da kenduko duten laguntza? Zenbat jendek jasotzen du? Hemendik aurrera zer? Hernaniko Ongintzako zentroan egon eta gai honi buruzko informazio pixka bat biltzen saiatu gara.
PRODI (gazteleraz Programa Temporal de Protección por Desempleo e Inserción) izena du otsailaren 15ean moztuko duten programa berezi honek. 2009. urtean sortu zuen Espainiako Gobernuak krisi ekonomikoak langileengan zituen eraginak ´goxatzeko`. Orain, bi urte beranduago, programa gehiago ez luzatzea erabaki dute. Krisia ´biguntzeko` Krisi ekonomikoak lan munduko egoera asko estutzea ekarri du. Bi eragin nagusi aipatu daitezke; batetik, langabezian dagoen pertsona kopurua handitu da. Eta bestetik, langabezian pasatzen den denbora ere luzatu egin da, hau da, lan berria aurkitzea lehen baino zailagoa da. Honek ekarri duena da, geroz eta jende gehiagori langabezia prestazioak (´paroa`) eta beste laguntzak bukatu egiten zaizkiola, eta diru sarrerarik gabe gelditzen dela. Muturreko egoera horretan, bazterketa sozialerako arriskuan geroz eta herritar gehiago zegoela ikusita, Espainiako Gobernuak PRODI izeneko programa hau jarri zuen martxan 2009garren urteko abuztuan. Bi funtzio nagusi betetzeko asmoa zuen. Bata, diru-sarrerarik gabe geratu diren langabetuei sei hilabetez ekonomikoki laguntzea. Bigarrena, pertsona horiek berriro laneratzeko formazio programa bat jasotzea. Printzipioz ezohiko neurri bezala pentsatuta zegoen programa hau, krisi egoera epe motzera hobetuko zelako esperantzarekin. Baina lehen sei hilabeteak pasa ondoren, eta krisia oraindik okerrera zihoala ikusita, beste sei hilabetean luzatzea erabaki zuten. Eta gero, beste sei hilabetez, gaur arte. Orain presupuestoek ez dute hainbesterako ematen.
PRODIa bakarrik
bukatzen da
Azken hilabeteetan bolo-bolo ibili da erreforma ekonomikoen gaia, batez ere, pentsioen erreformarena. Gai nahiko korapilatsuak dira eta askotan elkarren artean nahastera eramaten gaituzte. PRODI programa hau kentzeak ez du esan nahi beste laguntza edo prestazio sozial batzuk kenduko dituztela. Eta ez du zerikusirik pentsioekin.
Datu interesgarri batzuk
PRODIa programa berezi bat da, langabezia prestazioak bukatu dituen jendeari bideratuta dagoena. Gehienez sei hilabetean jaso daiteke laguntza hau eta pertsona berak ezin du bi aldiz jaso. Programan parte hartzeko baldintza batzuk bete behar dira. Esan beharra dago, baldintzak gogortzen joan direla etengabe. Hauek dira betebehar horietako batzuk:
Langabezia prestazioa bukatuta edukitzea, eta beste laguntza sozialik ez izatea.
65 urte baino gutxiago izatea. 30 eta 45 urte artekoa bada, karga familiarrak izatea.
Etxeko diru-sarrerak (gurasoekin bizi bada, bikotearekin, seme-alabekin…) zati etxeko pertsonak, ez iristea 480 eurora.
PRODIa Hernanin
Hernanin PRODIa zenbat jendek jasotzen duen jakitea oso zaila omen da. Sei hilabeteko laguntza puntuala denez, etengabe kopurua aldatzen doa. Batzuk sei hilabeteren ondoren programa utzi behar dutelako eta jende berria ere sartzen delako.