Hamaikabat alderdiak prentsa ohar bidez azaldu du Gobernu Taldeak eta Arau Subsidiarioen Testu Bategina idatzi duen taldeak hankasartze galanta egin dutela eta ezingo zaiola behin betiko onarpena eman testuari. «Pasa den urtarrilaren 20an Ingurumen Sailburuordetzak Hernaniko Udalari jakinarazi zion ingurumenean izango duen eraginaren ebaluazioa onartzeko, prozedura ez dela egokitzen legeak ezartzen duenera. Hankasartze hori dela eta, Arau Subsidiarioen Testu Bategina onartzeko prozesua gelditu egingo da hilabete batzutan eta dokumentua hasieratik tramitatu beharko da berriz. ANVk eta Erredaktore Taldeak zuten helburua, hau da, hirigintza planeamendua lotua uztea, bertan behera geratu da eta hauteskundeetan aterako den korporazio berria izango da zuzendu beharko duena egindako okerra».
«Bi legerekin jolastu dute»
Hamaikabatek azpimarratu du iruditzen zaiola ANVk eta Erredaktore Taldeak bi legerekin jolastu dutela, bakoitza komeni zitzaienaren arabera erabiliz, «eta jolasa gaizki atera zaie», dio. «Ez dute nahi izan behin betiko onarpena Diputazioaren esku utzi, aurreko legediak agintzen zuen bezala, eta 2006ko Lurzoruaren Legean oinarritu dira. Baina aldi berean ez dituzte bete legedi berriaren erabakiak».
Horrez gain, Hamaikabatek jakinarazi du, alegazioak egiteko epearen barruan, eskatu duela Testu Bategina onartzeko tramitea bertan behera uztea eta Ingurumen Sailburuordetzak eskatutakoa betetzea.